في ستات كتير بيدخلو الحرب ضد سرطان الثدي كل يوم وكل ست من دول بطلة تستاهل نتكلم عنها. فنانات عرب كتير اتشخصوا بسرطان الثدي وحاربوه بقوة وشجاعة وقدروا ينتصروا عليه.

تعالو نتعرف علي البطلات اللي انتصروا علي سرطان الثدي!

1 – اليسا

أعلنت اليسا في 2018 إصابتها بسرطان الثدي وإنها قدرت تقاوم المرض وتتعافي منه. ونزلت فيديو كليب “إلي كل اللي بيحبوني” واللي بيحكي ظروف تحديها للمرض، وفي الفيديو كليب بتظهر اللحظة اللي وقعت فيها خلال حفل دبي في فبراير 2018 واللي كانت في الوقت ده بتمر بمرحلة العلاج اللي كانت مرهق جداً.

وفي أخر الكليب وجهت رسالة بتقول فيها: “أنا تعافيت وقاومت المرض وغلبته، الكشف المبكر لسرطان الثدي قادر على إنقاذ حياتك”.

2 – شادية

تم تشخيص شادية بسرطان الثدي أثناء مسرحية “ريا وسكينة” ورغم انها كانت في الوقت ده بتخطط لعملية إستئصال الثدي، إلا انها كملت المسرحية علشان تبسط جمهورها. بعد رحلة العلاج والمقاومة، قدرت تنتصر علي المرض ورجعت كملت فيلمها “لا تسألني من أنا” وعملت اوبريت “الليلة المحمدية” وبعد كدا اعتزلت واتبرعت ببيتها لأبحاث سرطان الثدي.

3 – بسمة وهبة

اتشخصت بسمة وهبة بسرطان الثدي خلال سنة 2013 وخاضت حرب شرسة مع العلاج الكيماوي والعملية الجراحية لحد ما انتصرت عليه وقدرت ترجع لتقديم البرامج مرة تانية.

4 – زهرة الخرجي

في 2014 ظهرت الممثلة الكويتية زهرة الخرجي في مؤتمر صحفي وأعلنت إصابتها بالمرض وكمان حلقت شعرها قدام الصحفيين وقالت ” اللي انا عملته جاي من جوا قلبي، لأني إنسانة قبل ما أكون فنانة ولأني عارفة اللي المريض بيحس بيه من ضغوط نفسية بتخلي الحياة صعبة، وعلشان كدا لازم نواجه علشان نخرج من الأزمة مع المرض الخبيث والأهم أننا نتابع علشان نقدر للحد من انتشار المرض”.

5 ياسمين غيث

الممثلة ياسمين غيث، حفيدة الفنان عبدالله غيث، ظهرت في مسلسل حلاوة الدنيا مع هند صبري وظافر العابدين وعملت دور مريضة بالسرطان. أثناء تصوير المسلسل كانت بتقاوم سرطان الثدي فعلاً وبتتعالج منه، ولسه لحد دلوقت ياسمين في حربها مع المرض وهتنتصر انشاءالله.

6 – نورا رحال

أعلنت المطربة السورية نورا الرحال اصابتها بسرطان الثدي في 2007، وبعد ما حاربت المرض واتحملت آلام العلاج ورجعت من الحرب دي منتصرة، كملت رحلة العلاج وعملت عملية لترميم الثدي وكان من اسباب شفائها هو اكتشافها المبكر للمرض.

7 – امال دباس

الفنانة الأردنية امال دباس قدرت تكتشف إصابتها بسرطان الثدي في بدايته سنة 2011، وفي حوار مع مجلة لها حكت ازاي اكتشفت المرض وهي بتعمل كشف ذاتي، لاحظت وجود كتلة صلبة في الثدي واللي خلاها راحت تشوف دكتور وتعمل تحاليل وتبدأ العلاج. قدرت امال تنتصر علي المرض وترجع لفنها وحياتها مرة تانية.

8 فاديا الطويل

فاديا الطويل، الإعلامية الأردنية، حاربت المرض حرب طويلة. في أول مرة تم تشخيصها بسرطان الثدي قدرت تنتصر عليه بعد رحلة علاج طويلة. والمرض رجعلها تاني في القفص الصدري لكنها حاربت بشجاعة وانتصرت عليه. وبعدين المرض رجع مرة تانية بورم في المخ واللي فضلت تقاوم فيه فترة طويلة لحد ما قدرت تتخلص منه بعملية جراحية ناجحة، ورجعت تعيش حياتها بشكل طبيعي.

الفحص الذاتي مهم جداً علشان نقدر نكتشف المرض في مرحلة مبكرة ونقدر نعالجة بسرعة وننتصر عليه. الستات اللي انتصروا في حربهم ضد المرض كتير جداً. لازم تعملي فحص ذاتي مرة كل شهر وتعملي فحص دوري. علشان تعرفي ازاي تعملي فحص ذاتي اقري مقالتنا عن طريقة الفحص الذاتي. لقراءة المقال اضغط هنا.