2021 داخلة عالم الميم و بقوة.

أجدد ميم دلوقتي هاني… ويا تري مين هاني ده؟

هاني ده شخصية في مسلسل هذا المساء، واللي بيلعبه محمد سلمان، والمفروض إنو صاحب نائلة، اللي هي آروي جودة. المهم بقي أن جوزها أكرم، اللي هو إياد نصار، دخل البيت ولقي هاني ده طالع من أوضة نوم نائلة، زي ما انت شايف في الفيديو كده.

في حين ان المسلسل إتعرض في 2017، المشهد أتشهر وقلب السوشيال ميديا بعد ما صفحة “ايه ده” نشرته. الصفحة معمولة للناس عشان تحط الميمز بتاعتها من مشاهد قديمه لأفلام ومسلسلات مع بعض التعديلات المضحكة. في أقل من 24 ساعه الفيديو حصل علي مليون مشاهدة,وكان السبب ف المئات من الميمز.

الفكرة بقي أن مسلسل هذا المساء بقاله حبة معروض علي Netflix والمسلسل عظيم كده كده. بس فجأه ظهر الفترة دي ميمز وعالم كده عن مشهد هاني اللي أنتو شايفينو فوق ده.

آروي جودة نفسها نزلت بعض من ميمز أساحبي الي معمولة عن المسلسل.

وده معناه بشكل كبير أن ده ممكن يكون لجان ألكترونيه مسئولة عن إنها تطلع المسلسل للنور وتوصله لشريحة الميم لوردز. دي طريقة جديدة أكيد عشان توصل الأعمال الفنية للناس وتخليها مادة خام للحديث اليومي. وده هيخليك تتفرج علي المسلسل عشان تعرف أكتر عن المشهد.

الطريقة دي معمولة حول العالم أصلاً وNetflix نفسها بتعمل ميمز من المسلسلات بتاعتها عشان تخلي المسلسل حاضر في ذهن الناس بأشكال مختلفة منها الميمز.

الخطة نجحت وطلعت خطة في منتهي الذكاء والناس بدأت تتفرج علي المسلسل ده ،أنا نفسي بدأت أتفرج علي المسلسل عشان أفهم أيه حوار هاني ده ،

لأن كمان الناس اللي شافت المسلسل بتقول أنو مكنش زي ما الميمز مصواره وان لازم نتفرج عشان نفهم مش بس نتفرج علي الفيديو البسيط اللي مش موضح هي ليه قالت كده بالثقة دي.