أول براند ملابس في مصر لأصحاب الاختلافات الجسدية – Adaptive Appeal

Adaptive Appeal

مش سهل إنك تقدم حاجة مختلفة ماتقدمتش قبل كدة، ف لما تبقى حاجة مختلفة و كمان بتفيد أصحاب الاختلافات الجسدية اللي مش واخدين الاهتمام اللي يستحقوه، مش متشافين كفاية و ماحدش حاسس بالمعاناه اللي بيعدوا بيها كل يوم.. هنا بقى أنت محتاج سقفة

Adaptive Appeal هي أول براند ملابس في مصر لذوي الهمم، و كان وراها أشجان الأبحر و محمد وجدي اللي قرروا إنهم عايزين يعملوا حاجة تسهل حياه أصحاب الاختلافات الجسدية و تخليهم يقدروا يلبسوا حاجة شيك و شكلها حلو و كمان تكون مناسبة ليهم و يقدروا يلبسوها من غير ما يحتاجوا مساعدة.

البراند ابتدت فعلياً في مارس 2020 ، قدمت مجموعة صيفية و شتوية لقصار القامة، أصحاب الكراسي المتحركة و الأطراف الصناعية و مصابي الشلل الدماغي. المبهر في Adaptive Appeal إن كل حاجة بيقدموها حقيقية، العارضين مش مجرد ناس بيلبسوا لبس و يتصوروا بيه و خلاص، كل شخص منهم بيقول رأيه و بيتسمع و بيتقدر، بيكون فيه نقاشات عشان يحاولوا يعرفوا منهم تفاصيل أكتر تفيدهم في تصميم ملابس تكون بتحل لكل شخص المشكلة اللي بتقابله و كمان يكون بيلاقي فيها اللي مش بيلاقيه في السوق بشكل عام.

كل قطعة ملابس بتتعدل لو حسوا إنها ممكن ماتكونش مريحة للي لابسها حتى لو 1%، و الحلول اللي بيدوها مع كل تصميم حلول حقيقة فعلاً، ف مثلاً هتلاقي عندهم فساتين طول الكم فيها مناسب بالظبط لمكان البتر لإن طبيعي من حق أي بنت تلبس فستان و كل حاجة فيه تكون مظبوطة عليها.

أول براند ملابس في مصر لأصحاب الاختلافات الجسدية - Adaptive Appeal

كمان لإن معظم مصابي الشلل الدماغي بيكون عندهم مشكلة في استخدام إيديهم في ربط الأحذية أو التعامل مع الزراير فعملولهم الزراير مغناطيس، و سابوها من برا بس كشكل مش أكتر.

أول براند ملابس في مصر لأصحاب الاختلافات الجسدية - Adaptive Appeal

هتلاقي كمان عندهم فساتين و جواكت كلاسيك تفصيلها و طولها مناسبين إن يكون شكلهم حلو في نفس الوقت مايضايقوش صاحبها في حركة الكرسي، دة غير إنهم حلوا مشكلة تقطيع المسامير لخامة البنطلون اللي بتحصل في حالة تركيب جهاز تعويضي ف أي حد يقدر يلبس اللي نفسه فيه من غير ما يشيل هم القطع اللي ممكن يحصل في الملابس أو إنه مايحسش بالراحة في اللبس اللي بيقضي بيه اليوم كله.

أول براند ملابس في مصر لأصحاب الاختلافات الجسدية - Adaptive Appeal فكرة Adaptive Appeal حقيقي طازة و مبتكرة و تستاهل إن كل الناس تعرفها لإنها متعوب فيها و كمان مليانة تفاصيل كتير مش سهلة بدايةً من الوقت اللي بيأخده الشخص عشان يقدر يلبس هدومه و يقلعها و هل بيعمل دة لوحده ولا بيحتاج حد يساعده، لحد الخامات و المقاسات و اللي للأسف مابيكونش فيهم تنوع في المحلات ف ممكن شخص يضطر يلبس هدوم مش مقاسه ولا خامتها مريحاه بس لمجرد إن مفيش غيرها

هتلاقوا تفاصيل أكتر هنا لو حاببين تشتروا أو تتواصوا معاهم و تدعموهم

What do you think?

علا رشدي: حبوا نفسكم في الفلانتين

علا رشدي: حبوا نفسكم في الفلانتين واستنوني في موسم جديد من وجهة مظر

Rasha Kelej

Egyptian Senator Rasha Kelej Named Among the Most Influential African Woman in the World