Share
التاتو قرر مهم جدا لأنك هتعيش معاه طول حياتك وفكرة انك تشيله هتكون قرار صعب جدا وعلشان كدا قبل ما تاخد القرار ده عندنا ١٠ نصايح مهمين جدا هيساعدوك فيه.
١- بلاش نكتب اسم حد
أنا عارف انك بتحب، والدنيا بمبي في بمبي ولما بتسمع اسم اللي بتحبه بتبقي مبسوط وبتفكر ترسم اسمه تاتو. كيوت وحلو وجميل اوي!! بس بلاش .. الحب للاسف مش دايما بيستمر طول العمر واحيانا كتير المشاعر الجميلة اللي انتا حاسس بيها دي بتتحول لمشاعر سلبية وفي ناس قلبها بيتكسر .. فبلاش تيجي في الاخر وتلاقي تاتو في حتة في جسمك باسم حد سببلك وجع من اي نوع.
٢ – بلاش تاتو يعبر عن فكرة او معتقد او مبدأ
نفس فكرة الأسم .. الافكار والمعتقدات والمبادئ بتتغير مع الوقت واحيانا لما نبص للماضي بنشوف افكارنا القديمة ومعتقداتنا في الوقت دا كيوت ولذيذة بس احيانا بنلاقينا فقدنا كل الاحترام لمبدأ او فكرة معينة .. فبلاش تيجي في وقت وتلاقي تاتو يمثل فكرة انت مش بتحترمها مرسوم علي جسمك.
٣ – التاتوهات الملونة قرار صعب
مشكلة التاتو الملون انه متطرف اوي، لأما هيطلع حلو اوي لأما هيطلع وحش اوي ومفيش حياد .. فلازم تفكر قبل ما تاخد قرار انك تعمل تاتو الوان .. هل الالوان مناسبة للون بشرتي وعنيا وشعري؟ .. هل الالوان كتير؟
٤ – متخليش التاتو في حتت ظاهرة علي جسمك بالذات وانتا لابس بدلة
مؤسسات كتير مش بتوظف الناس اللي عندنا تاتو ظاهر من البدلة.. فلو كنت بتدور علي شغل في مؤسسة او شركة كبيرة او حتي صغيرة يبقي تجنب التاتو علي الكفين والوش والرقبة.
٥ – خد وقتك علشان تقرر هترسم ايه
دلوقت وبما انك عرفت ايه اللي مترسموش .. خد وقتك علشان تقرر هترسم ايه. متسمعش كلام الناس اللي بتقولك خلي التاتو كبير وكوول او صغير وبسيط. خلي التاتو يعبر عن شخصيتك. حاجة تكون ليها معني عندك انتا.
٦ – متعملوش في الصيف
لازم في الاول تعامل التاتو علي انه جرح ومتعرضوش للميا والشمس علشان ميحصلش التهاب والالوان تبهت وتبوظ. وبدل ما تضيع الصيف بتتجنب الشمس والميا انت ممكن تعمله في الشتا وتنبسط في الصيف. كمان الجروح بتلم احسن في الشتا.
٧ – اختار مكان كويس تعمل فيه التاتو ويكون فيه ارتيست بروفشنال
مفيش اسوء من تاتو بايظ .. ممكن تروح بديزاين تاتو جامد جدا والارتيست يبوظهولك خالص وده للاسف ملوش حل غير انك تتعايش معاه. فاختار مكان كويس وارتيست بروفشنال وشوف شغله القديم عامل ازاي. افتكر انه كل ما المكان كان ارخص كل ما الريسك كان ازيد.
٨ – بلاش تشرب قبل ما تعمل تاتو
غالبا في ناس هتنصحك تشرب علشان تقلل الالم. ده كمان ممكن الارتيست نفسه يقدملك حاجة تشربها. بس بلاش. الكحول بتزود سيولة الدم وده بيزود النزيف وبيكون خطر. كمان لما بنبقي شاربين غالبا بناخد قرارات هبلة وممكن نختار تاتو نندم عليه لما نفوق!
٩ – استعد كويس لانه التاتو بيوجع
في ناس بتقول انها محستش باي الم خالص، وناس قالت انه كان مؤلم جدا .. بس في كلا الاحوال النتيجة تستاهل اي وجع.
١٠ – اعتني بالتاتو في الاول كويس
زي ما قلنا قبل كدا: التاتو في الاول لازم تعامله علي انه جرح مفتوح وده معناه متعرضوش للشمس والميا المالحة وكمان تنضفه كويس بمناديل مبللة اول كام يوم بس من غير ما تعرضة لاي ميا وتحطله كريم مطهر.
أخر حاجة هنقولها: لازم تحب التاتو بتاعك وتحب قرارك واختيارك. وبلاش تكتب اسم حد. بجد دي اهم نصيحة. كمان بعد ما التاتو يلتئم ويبقي كويس لازم تفضل تستخدم صن سكرين كويس علشان تحميه من اشعة الشمس وبالذات لو كنت علي البحر لأن الشمس والميا المالحة بيخلو الوان التاتو تبهت.
Contributor
What do you think?
It is nice to know your opinion. Leave a comment.