هل المصريين عنصريين؟ لو سألنا السؤال ده للناس في الشارع غالباً هنلاقي رد فعل سريع، وإحتمال غاضب، أنه لاء، المصريين أكيد مش عنصريين خالص.

طيب يا سيدي، من كام يوم التيكت توكيرز الصينين نزلوا بحملة تعليقات بتعبر عن غضب شديد بسبب فيديوهات بعض المصريين اللي اعتبروها عنصرية ومهينة.

اللي حصل أن في تريند علي تيك توك بيرقصوا فيه علي مهرجان سكة تانية، وفي الحتة اللي بيقول فيها “ده جمالها معدي الصين” بيعملوا حركة بأيديهم كدا علشان يخلوا عنيهم ضيقة. قال كدا يعني بقوا صينين!

https://youtu.be/YHOI9X3nh3k

بالإضافة لحركات تانية، علي نفس الكوبلية في الأغنية، واللي قاصدين بيها تقليد الصينين، واللي مش بتعبر غير عن جهل بالثقافة الصينية وحاجة أخر استعباط.

مستخدمي التيك توك الصينين متعصبين جداً من اللي بيحصل ده

طبعاً حالة من الغضب اجتاحت التيك توك الصيني بسبب الفيديوهات دي وفضل التيك توكرز الصينين يسيبوا تعليقات إستهجان علي اللي بيحصل ده ويطالبوا التيك توكرز المصريين دول بحذف الفيديوهات لأنهم اعتبروها عنصرية ومهينة.

مفيش استجابة حقيقية من التيك توكرز المصريين بخصوص اللي حصل ده ومفيش أي فيديوهات، لحد لحظة كتابة المقال ده، اتحذفت.

هل فيديوهات تيك توك دي عنصرية فعلاً؟

العنصرية كلمة سلبية بتعبر عن التفرقة في التعامل مع البشر بناءاً علي مظهرهم الخارجي أو إنتماءاتهم الفلسفية والعقائدية أو الجيوغرافية.

يعني أنك تعامل حد بشكل مختلف سواء حلو أو وحش علشان هو لون بشرته كدا أو شكل وشه كدا أو جاي من بلد كذا أو مؤمن بدين معين.

والتقليل من مجموعة معينة من البشر سواء بالهزار والتريقة أو الحرق في أفران الغاز “الهولوكوست” هي مجرد درجات مختلفة للعنصرية، وفي جميع الأحوال مش مقبولة.

الصوابية السياسية بتقول اننا نعامل البشر علي اساس افعالهم بغض النظر عن اي حاجة تانية فيهم وبتقول برضه أننا نحترم كل البشر ونحترم الحدود الثقافية اللي البشر دي بيحطوها.

يبقي ايه العنصري برضه في فيديوهات تيك توك دي؟

الصينين بيعتبروا أن الحركات اللي التيك توكرز المصريين دول بيعملوها بايديهم وعنيهم دي مهينة وعنصرية وهنا هما بيحطوا حدود ثقافية واضحة وبيطالبونا نحترمها.

وعموماً تقليد الملامح الجسمانية لجنس معين من البشر تعتبر عنصرية من زمان. زي الأمريكان البيض لما كانوا بيصبغوا وشهم اسود علشان يمثلوا أدوار افارقة في الأفلام. الموضوع كان عنصري وقبيح ومهين.

وعموماً برضه من حق أي مجموعة من الأفرد تحدد ايه عنصري وايه مش عنصري طالما الموضوع متعلق بيهم شخصياً. مش كدا برضه؟

اللي بيحصل علي التيك توك بيوضح مشكلة عميقة عند بعض المصريين.

مينفعش نعمم علي المصريين أو غيرهم أي حاجة. لكن اللي بيحصل النهاردة علي التيك توك بيوضح مشكلة كبيرة عند بعض المصريين وهي أن المصريين عندهم قدر كبير من العنصرية.

العنصرية دي بتتضح جداً في طريقة التعامل مع السائح الأبيض في مقابل طريقة التعامل مع السياح من أي جنسية أو لون تاني.

وطريقة التعامل مع اللاجئين السوريين علي سبيل المثال في مقابل طريقة التعامل مع اللاجئين الأفارقة.

الأفارقة والأسيويين في مصر بيتعاملوا معاملة سيئة جداً وبيسمعوا تريقة وقلة ذوق كتير في الشوارع، وأنت يا سيدي القارئ أكيد شفت وسمعت ده بنفسك كتير قبل كدا.

الهزار والضحك علي الناس من أجناس تانية عمره ما كان لطيف ولا يضحك، هو مجرد عنصرية بحتة وأحنا محتاجين نفوق ونعترف بيها علشان نعرف نشتغل عليها ونحلها.

ازاي نقدر نحل مشكلة العنصرية في مصر؟

الطريق لحل أي مشكلة يبدأ بالإعتراف بوجود مشكلة. وبعدها نبدأ نشتغل علي المشكلة دي من جذورها، وجذور العنصرية في مصر بيرجع لثقافتنا الحالية اللي سيطرت عليها أفكار الرجل الأبيض اللي احتلنا فترات زمنية طويلة وغير مفاهيمنا عن العالم وشكل ثقافتنا الحالية اللي بتقدس الرجل الأبيض وبتحتقر كل الأجناس التانية اللي كان مسيطر عليها.

وعلشان احنا من الأجناس اللي الرجل الأبيض سيطر عليها كتير، عندنا عنصرية داخلية ضد بعض كمصريين.

احنا محتاجين ننشر الوعي من خلال التعليم والميديا ونفتح نقاشات عن العنصرية وأشكالها ومنابعها ونتكلم عن ازاي نقدر نكون أفضل.

بمناسبة شيكابالا، 5 حكايات مرعبة عن العنصرية ضد أصحاب البشرة الداكنة في مصر