in

عشر نصائح لطلبة الجامعة اللي رايحين يعيشوا بعيد عن اهلهم لأول مرة

الاستقلالية فكرة صعبة. مثيرة وجميلة، لكن مليانة مخاطر، وطلبة الجامعة المغتربين بيواجهوا ده لأول مرة في حياتهم

traveller train station hero 2x scaled
traveller train station hero 2x scaled

فكرة الاستقلالية للشباب في مصر مش فكرة منتشرة أوي. أحنا مش بنكمل 18 سنة وبنروح نعيش بعيد عن اهلنا زي الناس التانية. وعلشان كدا اهلنا، للأسف، مش بيأهلونا للاستقلالية دي بدري. ومعظم طلبة الجامعة اللي بيسافروا من الأقاليم للقاهرة، أو من بيت أهلهم لمحافظة تانية، علشان الجامعة، بيكونوا قلقانين جداً. والفكرة بالنسبالهم، رغم انها مثيرة، لكن برضه بتكون مرعبة.

عشر نصائح مهمين علشان طلبة الجامعة يعرفوا يبدئوا التجربة دي ويكملوا فيها بنجاح

1. اختار سكن قريب من جامعتك

لازم تنزل قبل بداية الترم وتتمشى في المنطقة المحيطة بالجامعة علشان تلاقي شقة قريبة. استخدم اوليكس او شوف ارقام سماسرة… هتلاقي شقق بأسعار مختلفة. لف واتفرج علي شقق كتير قبل ما تاخد شقة. هتلاقي حاجات كتير كويسة في حدود البادجيت بتاعتك.

2. اختار الرومايت بتوعك

طلبة-الجامعة

لو تقدر تاخد شقة مع صحابك هيكون أفضل بكتير، لأن التواصل بينك وبين الرومايتس هيكون تحدي في الأول. لو مش هتعرف تعمل كدا يبقي لازم تعمل انترفيوز مع الرومايتس وتختار ناس شبهك، علشان تلاقوا مساحة مشتركة تتناقشوا فيها. النقاش هو باب التواصل والتواصل هيساعدكم تخلقوا مساحات مريحة في الشقة علشان متسخفوش علي بعض.

3. انزل اتعرف علي المنطقة بتاعتك

قبل ما تروح تسكن في الشقة، أنزل اتعرف علي المنطقة كويس. شوف الأسواق والصيدليات والماركتس فين. هتشتري احتياجاتك منين. الناس بتتمشي فين وبتقعد فين. المطاعم والقهاوي والمغسلة فين؟

4. اعرف مواصلات المنطقة كويس علشان أوبر هيفلسك

اسأل اهل المنطقة عن المواقف فين والمواصلات بتروح وبتيجي منين. أعرف ازاي تروح الجامعة في المواصلات، علشان أوبر هيبهدلك. لو مش عايز تركب مواصلات، أعرف سويفل أو اوبر باص بيعدي في منطقتك أمتي وأحجز الرحلات القريبة من وقت الجامعة بتاعتك. دا هيكون أمان ومريح جداً. هيكلفك اكتر من المواصلات بشوية، بس أكيد أقل من أوبر.

5. أعمل شلة صحاب كويسة

طلبة-الجامعة

أنت في مكان جديد بعيد عن أهلك لأول مرة، رغم أنك ممكن تكون متحمس أوي لكن هتحس بوحدة والموضوع هيبقي صعب بالذات في البداية. متقفلش علي نفسك وتقول عايز اركز واذاكر. اعمل شلة صحاب، ومش لازم يكونوا صحاب الكلية بس او طلبة جامعة بس. اعمل صحاب من المنطقة أو صحاب من كليات تاني ممكن تتعرف عليهم في النشاطات الطلابية.

شلة الصحاب هتهون عليك الغربة أوي.

6. ظبط الميزانية بتاعتك

في البداية الموضوع هيبقي صعب. ممكن تلاقي مصروف الشهر كله اتصرف في أول اسبوع.

أعمل جدول، شوف عايز تشتري ايه خزين للبيت واشتريه اول الشهر. ده يشتمل علي اللحوم والباستا والتوابل والصابون والمنظفات وكل حاجة. وبعد كدا خلي في مبلغ معين كمصروف لكل اسبوع. طبعاً شوف المذكرات وطلبات الكلية هتحتاج منك متوسط قد ايه كل شهر.

ده هيساعدك تقلل المصاريف وتحوش كمان.

7. اتعلم الطبخ

طلبة-الجامعة

هو خلاص ماما واخواتك البنات مش هيطبخولك وأكل برة والجانك فوود هيموتوك وهيدمروا الميزانية الجميلة اللي عملناها فوق. لازم تتعلم تطبخ. هيبقي صحي اكتر وأوفر طبعا.

اتعلم الحاجات البسيطة الأول. زي الرز والباستا وشربة الخضار. اتعلم تسلق الفراخ وتحمرها. الحاجات دي سهلة وهتتعلمها بسرعة وهتوفرلك وجبات لذيذة ومتكاملة في البداية. وبعد كدا دوس بقي في الطواجن والبشاميل. هتبقي الشيف شربيني!!

8. خد بالك من نضافة الشقة

طلبة-الجامعة

اغسل اطباقك أول بأول. بلاش تسيبها في الحوض. نضف الشقة مرتين في الأسبوع. مش هياخد منك ساعة في كل مرة. بدل ما تلافيها بقت زريبة أخر الشهر وتاخد منك يوم بطوله وتكسر ضهرك في التنضيف. طلبة الجامعة غالبا بيقولوا ان معندهمش وقت للنتضيف. بس التنضيف في نفس اهمية المذاكرة والأكل. لازم تلاقيله وقت.

9. وازن بين الدراسة واللعب

طلبة الجامعة بيواجهوا ضغوط نفسية مرهقة جداً. ضغط الدراسة والمشاريع والمحاضرات. بلاش تزود الضغط ده علي نفسك. الجامعة مرحلة جميلة جداً تقدر تكتسب فيها خبرات كتير وتتعرف علي ناس جديدة وتكتشف فيها نفسك وفلسفتك في الحياة. اعمل جدول لنفسك: أعرف هتذاكر أمتي وهتنزل تقابل صحابك وتنبسط أمتي.

10. شارك في النشاطات الطلابية

طلبة الجامعة عندهم نشاطات كتير ومختلفة، شوف أنت بتحب أيه. في نوادي للكتاب والسينما ومنظمات حقوقية ومنظمات خيرية. النشاطات دي بتكون غنية جداً بالخبرات والناس الكويسة وهتخليك تفهم نفسك أكتر وتعرف أنت بتحب أيه وعايز تعمل ايه بعد الجامعة. هتفهمك ايه نقاط قوتك علشان تعرف اللي هيناسبك في سوق العمل بعد كدا.

في النهاية، متخفش. الاستقلالية أحلي تجربة هتمر بيها. والمفروض كنا نمر بيها قبل كدا وبأختيارنا مش نُجبر عليها. استمتع بالتجربة واتعلم منها. اكتسب الخبرة وانبسط باستقلاليتك الجديدة وحاول تكون انسان مسئول، ده هيديك دفعة كويسة في مسار حياتك وثقتك في نفسك.

What do you think?

Avatar

Written by Ahmed Dahabi

Blogger. Interested in cinematic, literature and fashion criticism. And the flamboyant boy, vogueing in the party

Comments

Leave a Reply

Avatar

Loading…

0
نجم يا ستار

Watch: When Hassan Abou El Rouss and Hossam Hosney Brought Mo Salah to the 90s!

IMG 20200918 144721 682

Jennifer Aniston & Brad Pitt Reunite on Screen, For a Good Cause