Omar Bakry
هاشتاجات تويتر مؤخرا كانت سبب في رجوع حقوق ناس كتير و اظهار الحقايق في مواضيع اكتر سواء عن طريق التحقيق فيها من قبل النيابة العامة المصرية او باي طريقة تانية قانونية بتقوم بيها الجهات المختصة في الدولة.
لكن مؤخرا هاشتاج جديد ظهر و هو هاشتاج #جسد_مريم_ملكها اللي فيه قصة بنت اسممها مريم عندها نزيف و ورم في الرحم و محتاجة تعمل عملية استئصال رحم و لكن العمليات دي خصوصا اللي في الرحم بتستوجب موافقة الزوج طالما على ذمته، اللي في حالة مريم بينهم مشاكل و رافعة عليه قضية خلع. موضوع مريم اتحل و فعلا هتعمل العملية خلاص.
من اسم الهاشتاج ممكن يبان الموضوع بسيط و اتحل لكن الموضوع اكبر من كده فا تعالوا نعرف الحكاية بالتفصيل و هل الموضوع مريم بس ولا فيه بنات غيرها كتير؟
ايه حكاية هاشتاج “جسد مريم ملكها”؟
الحكاية بدأت ان واحدة اسمها نيفين شلبي نزلت بوست بتحكي فيه الموضوع باختصار و هو ان بنت اسمها مريم بتعاني من نزيف من شهر نوفمبر اللي فات و اورام في الرحم و امينا حادة و لازم تعمل عملية استئصال رحم.
لكن القانون في الحالة دي بيشترط موافقة الزوج طالما مريم متزوجة لسه. لكن الحقيقة ان مريم و زوجها فيه مابينهم مشاكل كتير و هي رافعة عليه قضية خلع و هو بيتهرب منها و لكن برضو هي محتاجة تعمل العملية بغض النظر عن المشاكل و اهلها و اصحابها بيطالبوا الجهات المسئولة انهم يتصرفوا و يدخلوا مريم للعملية لان حالتها خطر.
العملية عشان تتم لازم موافقة الزوج، أو أن الحالة تدخل في مرحلة خطيرة ف يتغاضوا عن موافقة الزوج..
ياريت أي جهة تتدخل وتاخد بيانات مريم ويطلعلها تصريح بالعملية.. مش منطقي أن واحده بالغة تبقى مش عارفه تتعالج عشان مستنيه موافقة جوزها أو أي شخص تاني! pic.twitter.com/WCpDu3rLY4
— Speak Up (@SpeakUp_00) March 20, 2022
و الناس بدأت تتداول قصة مريم على تويتر
الناس بدأت تعبر عن استغرابها من ان القانون ممكن يمنع مريم و هي بالغة و صاحبة قرار من انها تعمل عملية مهمة هتنقذ حياتها لان موافقة الزوج مطلوبة حتى و هما بينهم مشاكل و هو بيتهرب منها.
متخيلين إن انسانة بالغة محتاجة موافقة من زوجها عشان تعمل عملية بتهدد حياتها، وبسبب خلافات بينهما بيتهرب منها ويعيشها فى عذاب والقانون المفروض يحميها واقف ضدها!!
دة عقد زواج يابشر مش عقد بيع وامتلاك.#جسد_مريم_ملكها#جسد_مريم_ملكها pic.twitter.com/cg7jS4B7RV— أمل العشماوي (@Amel_elashmawy) March 21, 2022
كمان الفنانة سمية الخشاب قالت رأيها في تويت ان من حق اي ست انها تقرر مصير اي جزء من جسمها مش اي حد تاني له الحق ده
جسم الست ملكها وليها حق انها تعمل اي حاجه فيه وتتخلص من اي جزء فيه دون اذن خصوصا لو بتموت منه، ازاي يبقي في حد له وصاية على جسم حد تاني! #جسد_مريم_ملكها
— Somaya Elkhashab (@somayaelkhashab) March 20, 2022
و بدأوا يتكلموا ان ده فيه ظلم كبير للستات في مصر لان قرار مهم زي ده هيؤثر على حياتها ميكونش بايديها و بايد زوجها
حياة وصحة الراجل فى مصر بتتوقف على قدرته المادية وقراره الشخصي أما حياة المرأة بتتوقف على قدرتها المادية و رأي ابوها أو اخوها أو عمها أو جوزها أو …. ايه ده موتي؟ لا حول ولا قوة الا بالله ميعادها واحنا كان نفسنا نعالجها بس نقول ايه جوزها كان غير متاح#جسد_مريم_ملكها
— ياسمين حمزة (@YasmineHamza4) March 21, 2022
رد احد اعضاء نقابة الاطباء
على هاشتاج #جسد_مريم_ملكها البوست بتاع نيفين وصل لاحد اعضاء نقابة الاطباء و رد عليها فعلا بالقانون ان لو فيه تقرير طبي من طبيبها بيقول ان فيه خطورة من حالتها و تهديد لحياتها زي ما نيفين كاتبة يبقا هنا لا يشترط موافقة الزوج و بالتالي لا يتم محاسبة الدكتور لو عمل لها العملية بدون موافقة زوجها.
ده كان رد واحد من أعضاء النقابة على بوست نيفين.. المفروض تستنى لما يكون فيه تهديد على حياتها عشان تضطر تعملها من غير موافقة؟#جسد_مريم_ملكها pic.twitter.com/T9fPVQfYQZ
— Speak Up (@SpeakUp_00) March 20, 2022
المشكلة اتحلت لكن كان بعد تدخل دكتور كبير في الحالة
بعد ساعات من تداول الهاشتاج دكتور كبير شاف حالة مريم و التحاليل و الأشعة بتاعتها و قال انها حالة خطر لازم تتعمل لها العملية طوارئ بدون موافقة الزوج و فعلا مريم خلاص في طريقها للمستشفى عشان تعمل العملية النهاردة.
مريم في طريقها للمستشفي عشان تعمل العملية بعد ما دكتور كبير تواصل معاها وشاف الأشعة والتحاليل بتوعها ولقى أن حالتها خطرة وتستدعي العملية كحالة طوارئ بدون موافقة الزوج.
الحمد لله كده مشكلة مريم اتحلت وربنا يقومها بالسلامة؛ شكراً لـ نيڤين شلبي ولكل حد كتب عن مريم.#جسد_مريم_ملكها pic.twitter.com/mxudDlqdLd
— Speak Up (@SpeakUp_00) March 21, 2022
تدخل دكتور كبير شئ ايجابي لكن الموضوع مش بس حالة مريم لا فيه حالات كتير جدا شبهها و يمكن اسوأ موصلوش للسوشيال ميديا و معندهمش وعي او مقدرة كافية انهم يشوفو كذا دكتور
ان فيه دكتور كبير يتدخل و يشوف ان الحالة طوارئ فعلا و لازم تتعمل العملية بسرعة شئ حلو لكن هل الحالة الخطر اللي المرض بيهدد حياتها حقيقي عليه خلاف مابين الدكاترة؟ هل فيه مساحة ان الدكاترة تختلف هل الحالة صعبة و طوارئ فعلا او لا لسه فيه مساحة للعلاج العادي و المخاطرة بصحة مريض؟ طب لو الموضوع مكنش تريند و كانت استمرت معاناة مريم و تعنت زوجها في الموافقة على العملية؟ و دول ناس كتير و هما الاغلبية.
لكن بسبب الشروط الموجودة في القانون زي شرط موافقة الزوج على اي عملية في الرحم طالما على ذمته برغم خطورة الحالة و ان احنا نستنا الحالة تبقا اسوأ و اخطر عشان نتغاضى عن الشرط ده هيخلي ستات كتير تفقد حقوق كتير ليها و اهم حق هو الحفاظ على حياتها حتى لو في المقابل التضحية بالرحم نفسه مثلا.
كمان حتى لو الدكتور شاف الحالة صعبة و قرر او فضل انه ميجازفش انسانيا بحالة المريضة و قرر انه يعمل العملية من غير ما تكون موافقة الزوج موجودة ده هيخليه بوجود الشرط ده يتحاسب و من حق الزوج ساعتها انه يقاضيه انه تصرف من غير موافقته فا حتى لو نية الدكتور خير القانون بوجود الشرط ده مش هينصفه و مش هيخليه بيتصرف لمصلحة الحالة فقط بل هيفكر في ميت حاجة تانية حتى لو المريضة نفسها ماضية اقرار بتحمل مسؤولية قرارها.
ده غير ان العلاقات مابين المتزوجين في مصر و في اي حتة في العالم بطبيعة الحال معرضة لاي مشاكل في اي وقت و ممكن تؤدي للطلاق و ممكن طرف يتعنت ضد الطرف التاني و طرق التعنت و الابتزاز كتيرة فا مينفعش ابدا ان يكون مصير بني ادم في حالة مرضية صعبة متوقف على موافقة شخص تاني ممكن تكون نيته سيئة.
