Omar Bakry
واضح كده اننا داخلين على موسم مسلسلات رمضان قوي اوي السنادي بنجومه كلهم لان المنافسة جامدة و بدأت الناس تحتار هتشوف ايه ولا ايه من قبل اصلا ما الموسم يبتدي.
عشان كده قررنا نجمع كل مسلسلات رمضان اللي هتتعرض على منصة WATCH iT المصرية في موسم رمضان 2022. يلا نشوف المسلسلات.
ملف سري
بتدور الاحداث في 2013 و بيحكي عن شخصية قاضي (هاني سلامة) اللي بيحقق في قضايا غسيل اموال و قضايا تانية كتير كانت في الفترة دي وازاي ناس كانوا بيتدخلوا في أحوال البلد. بتظهر الفنانة عائشة بن احمد و بتحصل بينها و بين هاني سلامة قصة حب.
مسلسل ملف سري من بطولة، هاني سلامة، ومحسن محي الدين، وماجد المصري، وشيرين، وإدوارد، ومادلين طبر، ونضال الشافعي، وعائشة بن أحمد، وكارولين عزمي، من تأليف محمود حجاج، وإخراج حسين البلاسي، وإنتاج فنون مصر.
العائدون
مسلسل العائدون مبنى على قصة حقيقية، وأحداثه الأصلية ملف أمني معاصر حصلت من 2018 إلى 2020، وبيتكلم عن إعادة احياء الارهاب و تدويره بشكل غير تقليدي بعيد عن الصورة النمطية للرجل الارهابي و عن ازاي الدولة واجهة الارهاب و الفساد.
العائدون بطولة أمير كرارة وأمينة خليل ومحمود عبد المغني و غيرهم كتير. ومن تأليف باهر دويدار و اخراج احمد نادر جلال.
فاتن امل حربي
المسلسل بيناقش المشاكل الزوجية عن طريق قصة معاناة زوجة بيحصل مشاكل مابينها و بين زوجها اللي بتوصل لمحكمة الاسرة و بالتحديد بيركز المسلسل على قضية الحضانة و قانون الاحوال الشخصية بشكل عام.
بتلعب دور الزوجة نيللي كريم و الزوج شريف سلامة اللي بيحصل مابينهم مشاكل. اما هالة صدقي بتلعب دور صديقة نيللي كريم اما الفنانة فادية عبد الغني بتقوم بدور ام شريف سلامة اللي بتحرضه على زوجته.
مسلسل فاتن أمل حربي بطولة نيللي كريم، شريف سلامة، هالة صدقى، محمد الشرنوبي و فادية عبد الغنى. المسلسل من اخراج ماندو العدل و تأليف ابراهيم عيسى و من انتاج العدل جروب.
جزيرة غمام
أحداث المسلسل في إطار اجتماعي صعيدى بتحكي قصة “بيت شافع” واولاده اللي بيحصل مابينهم خلافات كتيرة و بيناقش لحد فين ممكن توصلنا الخلافات اللي مابين الاخوات. المسلسل احداثه في العشرينيات يعني من 100 سنة.
مسلسل جزيرة غمام بطولة مى عز الدين، طارق لطفى، فتحى عبد الوهاب، أحمد أمين، رياض الخولى، عبد العزيز مخيون، محمد جمعة، هبة عبد الغنى و وفاء عامر. المسلسل تأليف عبد الرحيم كمال وإخراج حسين المنباوى.
الكبير اوي 6
مسلسل الكبير أوي 6 بيحكي قصة الكبير (أحمد مكي) اللي بعد فقده لمراته هدية بيواجه صعوبات كتير في تربية اولاده التوأم جوني والعترة فا بيضطر انه يتجوز بنت عمه اسمها زادة (رحمة احمد) اللي مكنش بيحبها بس هي بتحبه من زمان و بيتجوز كتير غيرها و بيحصل له مشاكل.
اما جوني بعد ما كبر و حس انه معملش انجازات في حياته بدأ يدور على نفسه و شغفه تاني في الوقت اللي بدأت فيه السوشيال ميديا تنتشر في المزاريطة فا بدأ يعمل فيديوهات سوشيال ميديا. و حزلقوم هيكمل رحلته في البلاد اللي فيها تحديات عشان يساعدهم في حلها و يعمل ثروة و بيرجع تاني بيته هند الكبير بمشاكل كتير جدا.
مسلسل الكبير أوي 6 من بطولة أحمد مكي، بيومي فؤاد، محمد سلام، هشام إسماعيل، ليلى عز العرب و رحمة أحمد. و من تأليف مصطفى صقرو إخراج أحمد الجندي.
احلام سعيدة
مسلسل احلام سعيدة بيحكي قصة ست من طبقة عالية بتقوم بدورها يسرا و بتحاول خلال أحداث المسلسل بمساعدة اصحابها انها تلاقي علاج للأرق اللي عندها و بيخليها تحلم بكوابيس وبتكون سبب في انها تشك في كل الناس اللي حواليها و بيحصل مشاكل سببه.
مسلسل احلام سعيدة بطولة يسرا، غادة عادل، مى كساب، انتصارو شيماء سيف. إخراج عمرو عرفة ، ومن تأليف هالة خليل
مكتوب عليا
المسلسل اجتماعي كوميدي بيحكي قصة شاب اسمه جلال (أكرم حسني) اللي بيقابل عجوز بيمسح على دراعه مادة مسحورة، اللي بيخلي من تاني يوم علطول احداث اليوم و كل اللي بيحصل مكتوب على ايده و ده بيسببله مشاكل كتير منها رجل اعمال بيحاول يستغلله فا بيحاول يلاقي علاج منه.
مسلسل مكتوب عليا بطولة أكرم حسنى، عمرو عبد الجليل، هنادى مهنا، ايتن عامر، حنان سليمان، محمد طعيمة، محمود السيسى و هلا رشدي. المسلسل من تأليف إيهاب بليبل، وإخراج خالد الحلفاوى.
سوتس بالعربي
سوتس بالعربي هو النسخة العربية من المسلسل الأمريكي Suits و بيحكي عن عالم القضاة و القضايا و المحاماة. مسلسل سوتس بالعربي من بطولة آسر ياسين وأحمد داود وريم مصطفى وصبا مبارك ومحمد شاهين وتارا عماد.
المسلسل من إخراج مريم أحمدي وسيناريو وحوار محمد حفظى وياسر عبد المجيد
المشوار
مسلسل المشوار بيحكي قصة زوجين ماهر (محمد رمضان) و ورد (دينا الشربيني) اللي بيشتغلوا باليومية في شركة ملاحة في الماكس في الاسكندرية و بيواجهوا تحديات كتير في حياتهم. المسلسل بيناقش الاتجار في الاثار و غسيل الاموال.
مسلسل المشوار بطولة محمد رمضان، دينا الشربيني، احمد مجدي، أحمد صفوت، خالد أنور، خالد كمال، كارولين خليل، محمد عز، ندا موسى، ثراء جبيل، محمود الليثى، حنان يوسف، سارة عبد الرحمن، محسن منصور، سما إبراهيم، محسن منصور، احمد كمال.
المسلسل تأليف محمد فريد وإخراج محمد ياسين.
راجعين يا هوى
مسلسل راجعين يا هوى بيحكي قصة رجل الأعمال بليغ أبو الهنا (خالد النبوي) اللي كان عايش برا مصر فترة طويلة لكن بيقرر يرجع مصر، وهو عليه ديون كتير بسبب خسارة تجارته في اوربا. و بيضطر بليغ انه يدور على ميراثه، من ورثة أخوه المتوفي، وتبدأ بينهم صراعات بسبب الكره والغيرة. و بيقع بليغ ابو الهنا في قصص حب كتيرة خلال احداث المسلسل.
مسلسل راجعين يا هوى مأخوذ عن رواية الكاتب الراحل أسامة أنور عكاشة. من بطولة خالد النبوي و نور اللبنانية، هنا شيحة, أنوشكا، وفاء عامر، أحمد بدير, إسلام إبراهيم، ونور النبوي, سلمى أبوضيف.
سيناريو وحوار محمد سليمان عبد الملك ومن إخراج محمد سلامة.
في بيتنا روبوت 2
مسلسل في بيتنا روبوت 2 هيكمل قصة يوسف (هشام جمال) اللي قرر في الجزء الاول انه يخترع روبوتين لذيذ (عمرو وهبة) و زومبا (شيماء سيف) لكن في الجزء التاني هيكمل اختراع روبوتات تانية من لذيذ و زومبا نتيجة دخوله في منافسة مع شركة تانية بدأت تصنع الروبوتات دي. كمان هيحكي معاناة يوسف (هشام جمال) مع مراته (ليلى زاهر) مع الحمل.
المسلسل بطولة هشامم جمال و عمرو وهبة و ليلى زاهر و شيماء سيف و ممثلين تانيين هينضموا للجزء التاني من المسلسل.
في بيتنا روبوت 2 من تأليف احمد محي و اخراج هشام جمال
دايما عامر
مسلسل دايما عامر بيناقش مشاكل التعليم في مصر خلال الفترة الأخيرة، بيطرح حلول لمشاكل المدرسين وأولياء الأمور والطلاب.
مسلسل دايما عامر بطولة مصطفى شعبان، ولبلبة، وأحمد الشامي، وعمرو عبد الجليل، و سينتيا خليفة ونضال الشافعي، وصلاح عبد الله، ومحمد ثروت، وكريم عفيفي، ومحمد محمود، وسما إبراهيم، وأمل رزق، وميرنا نور الدين، ولمى كتكت، وأحمد عنان.
المسلسل من تأليف أيمن سليم ومايكل عادل وإخراج مجدي الهواري، وإنتاج كامل أبو علي.
يوتيرن
مسلسل يوتيرن بيحكي قصة يارا الكردي (ريهام حجاج) اللي بتشتغل ضابطة بحرية لكن بتسيب شغلها عشان خاطر زوجها و بتعيش حياة صعبة معاه بسبب غيرته عليها من ابن خالتها و بتشتعل الاحداث بعد ما بتتعرض يارا لحادثة.
مسلسل يوتيرن، بطولة ريهام حجاج، وتوفيق عبدالحميد، فادية عبدالغني، كريم قاسم، عبير صبري و صفاء الطوخي. يوتيرن من تأليف أيمن سلامة، إخراج سامح عبدالعزيز.
