in

شطب حديقة الاسماك من قائمة التراث: ايه الحقيقة؟

شطب حديقة الاسماك من قائمة التراث: ايه الحقيقة؟

اشاعات و اخبار كتير عن منطقة الزمالك و تغيرات كتير بتحصل فيها و تطوير و دعوات لسكان المنطقة يقفوا ضد اي تغيير.. و لكن من جمال المنطقة محدش فكر هل الاخبار المنتشرة دي حقيقية ولا لا.. جبنالك الحقيقة

ايه اللي حصل؟

من اسبوع تقريبا انتشرت اشاعات ما بين سكان منطقة الزمالك ان حديقة الاسماك هتتشال من قائمة التراث ماعدا منطقة الجبلاية و الباقي هيتم تطويره بمشاريع مطاعم و محال تجارية. و كانت دعوة للناس عشان يقفوا ضد الموضوع.. لكن الموضوع فضل على السوشيال ميديا و في دواير صغيرة و معملش ضجة كبيرة خارج سكان الزمالك و فضلت الناس في حالة انتظار لاي تصريح او رد من وزارة السياحة و الاثار.. 

رد المجلس الاعلى للاثار

في مداخلة لامين عام المجلس الاعلى للاثار على عدة قنوات نفى الاخبار اللي بتقول ان الحديقة هتتشال من قايمة التراث و ان التطوير هيقلل من مساحة الحديقة.. 

و قال ان الحقيقة هي ان هيكون فيه مستثمر مسؤول عن تطوير المنطقة و التطوير هيشمل وجود اسماك في الحديقة لأنها مفيهاش سمك  و جراج للعربيات و اتوبيسات السياحة و مطاعم لخدمة الزوار.. 

قال كمان بخصوص الجراج انه مش هيؤثر على المنطقة بالعكس هيتم اقتطاع اقل من نصف فدان فاضي مفيهوش شجر او حاجة تراثية في منطقة حديقة الاسماك عشان يتعمل parking شكله كويس لان خارج المنطقة مفيش اي مكان لعربيات الزوار..

حقيقة شطب حديقة الاسماك من قائمة التراث: ايه الحكاية؟

و وضح كمان انه مازال قرار مبدأي لم يتم عرضه على مجلس ادارة المجلس الاعلى للاثار و وارد يحصل اي تغيير في المراحل اللي جاية او يبقى الوضع كما هو عليه.

رأي سكان الزمالك

و رأي سكان المنطقة في التطوير انه فعلا لابد منه و لكن بشرط عدم التعرض للمنظر الجمالي و ان لا يتم قطع اي اشجار من المكان للحفاظ على شكله كما هو..

و تم طرح افكار كتير منها ان المنطقة تكون مخصصة للعجل بس و ان يتم استغلال مراكب في النيل كوسيلة للتوصيل الي الحديقة للحفاظ على بيئة المكان من انبعاثات العربيات و الزحمة..

و ده كان طلب مقدم للمجلس الاعلى للاثار بخصوص تسجيل الحديقة عشان الموضوع يعاد النظر اليه بناء على طلب اهالي المنطقة و الاعتبارات البيئية و الثقافية للمكان.

شطب حديقة الاسماك من قائمة التراث: ايه الحقيقة؟

و ده الطلب اللي اتقابل بترحيب من المجلس الاعلى للاثار و اللي على اساسه الموضوع هيتعرض تاني على مجلس ادارة المجلس و هياخد خطواته القانونية كلها.

و عشان الحكاية دايما بيكون ناقصها تفاصيل مهمة في اصلها بنحب نعرف المفاهيم الاصلية لكل أطراف المشكلة او الموضوع. 

مين المجلس الاعلى للاثار؟

يهدف المجلس الأعلى للآثار إلى تنفيذ مسئوليات وزارة الثقافة في مجالات الآثار المصرية والإسلامية والقبطية وغيرها، و للمجلس في سبيل ذلك القيام بجميع الأعمال التي تؤدى إلى تحقيق أغراضه. 

يعني من الاخر المجلس الاعلى للاثار هدفه و دوره هو الحفاظ على الاثار و تطويرها مش تقليصها ولا هدمها ابدا. 

مين حديقة الاسماك؟

حديقة الأسماك أو حديقة الجبلاية، موجودة في الزمالك في شارع الجبلاية بالقاهرة ، عملها الخديوي إسماعيل في سنة 1867, و تعتبر من أفضل الحدائق اللي اتعملت في عصر الخديوي في القاهرة و مساحتها حوالي ٩ ونصف فدان. 

و حي الزمالك هو أحد الأحياء الراقية في غرب القاهرة و هو على جزيرة  في وسط  النيل «جزيرة الزمالك» و سكان الزمالك دايما عايزين يحافظوا على المنطقة و رقيها زي ما كان بدون اي تغيير و ده حق اصيل ليهم.. 

المناطق الاثرية و التراثية لا تستحق الاهمال اللي كانت فيه على مدار السنين كلها اللي فاتت و اي تطوير بيشملهم لازم ندعمه و نحاول نوصل للصورة كاملة بهدوء و بعقل و بدون تسرع في الحكم على الاشياء خصوصا ان وزارة السياحة و الاثار ملهاش سابقة سلبية في المواضيع دي و واثقين ان اراء سكان منطقة الزمالك هيتم مناقشتها و هيتوصلوا لمنطقة ترضي كل الاطراف. 

و في النهاية حابين نؤكد ان المجلس الاعلى للاثار بيشتغل بجد في كل المناطق الاثرية و التراثية في مصر من القاهرة لاسوان و بنلاحظ فعلا تطوير في كل المناطق السياحية في مصر عشان تليق بقيمة مصر كمقصد سياحي.. و اخرهم تطوير ممر الكباش في الاقصر و قصر محمد علي في شبرا لان الاثار لا تعوق التنمية.

Avatar of Omar Bakry

Written by Omar Bakry

Passionate Content Creator, my Mission is to let you know the Unknown and Write Content that serves your interests.

What do you think?

Leave a Reply

Your email address will not be published. Required fields are marked *

How Marwan Pablo's Latest Concert was a Complete Disaster!

How Marwan Pablo’s Latest Concert was a Complete Disaster!

إطلاق الإعلان الرسمي لفيلم خديجة بالتزامن مع عرضه العالمي الأول بمهرجان الجونة

إطلاق الإعلان الرسمي لفيلم خديجة بالتزامن مع عرضه العالمي الأول بمهرجان الجونة