في ستات كتير بيدخلوا الحرب ضد سرطان الثدي وبينتصروا عليه كل يوم، لكن في ستات تانين مبيقدروش يكملوا المعركة. كل شهيدة من الشهيدات دول تستاهل نتكلم عنها. في ذكري كل الشهيدات اللي سابونا في نص المعركة ضد سرطان الثدي، قررنا نعمل مقال حداد علي روح كل بطلات الحرب ضد المرض.

في ذكري الفنانات اللي سابونا خلال معركتهم مع المرض

1 – فايزة أحمد

فضلت الفنانة فايزة أحمد تخفي ألام المرض فترة طويلة علشان تقدم الحفلات وتسجل اسطواناتها، وكانت دايماً مؤمنة أن المرض الحقيقي انها متقدرش تقدم فنها لجمهورها اللي بيحبها. فضلت فترة طويلة تاخد كميات كبيرة من المسكنات اثناء تسجيل اغنية “لا ياروح قلبي” مع الموسيقار رياض السنباطي، وعيطت من شدة الألم بعد ما خلصت تسجيل الأغنية. وسابتنا الفنانة الجميلة بعد مواجهة طويلة مع المرض.

2 – مها صبري

دخلت مها صبري حربها مع المرض بكل الطرق لدرجة انها لجأت للدجالين اللي نصحوها تجرب اعشاب ومواد ضارة سببتلها قصور في الكبد وده كان سبب وفاتها.

3 – مديحة كامل

اصيبت مديحة كامل بسرطان الثدي في عز نجاحها الفني وسافرت لندن للعلاج وخضعت لعملية استئصال كامل للثدي وقدرت تنتصر علي المرض وترجع لحياتها وفنها مرة تانية لحد ما المرض هاجمها مرة تانية ومقدرتش تقاومه للنهاية المرة دي.

4 – ناهد الشريف

حرب ناهد الشريف مع سرطان الثدي استمرت فترة طويلة. بعد تشخصيها بالمرض سنة 1979 بدأت تقاوم المرض واستمرت حربها لمدة خمس سنين. استمرت في تقديم أعظم أعمالها الفنية خلال المرض. للأسف مقدرتش تنتصر علي المرض ورحلت عن عالمنا وهي بتحارب.

5 – هالة فؤاد

قاومت هالة فؤاد سرطان الثدي تلات مرات ما بين مستشفيات مصر وفرنسا وقدرت ترجع تكمل فوازير رمضان مع يحيي الفخراني. لكن للأسف المرض قدر ينتصر عليها لأنها اهملت الفحص الدوري، ورحلت عن عالمنا.

6 – رجاء بلمليح

المطربة المغربية رجاء بلمليح بدأت رحلة العلاج في فرنسا، وانتصرت علي المرض ورجعت تكمل أعمالها الغنائية، بس المرض رجع تاني وبعد ما حصلت مضاعفات سريعة، رحلت رجاء عن عالمنا بهدوء.

7 – ريم بنا

الفنانة الفلسطينية الجميلة، ريم بنا، اتشخصت بسرطان الثدي من تسع سنين وقدرت تنتصر عليه بعد حرب قوية. المرض رجعلها تاني واعلنت انها هتتوقف عن الغناء في 2016 بعد ما المرض اصاب احبالها الصوتية. وسابتنا ومشيت في نص رحلة العلاج بعد ما كتبت علي الفيس بوك “سأجري كغزالة إلى بيتي، سأرتب البيت وأشعل الشموع، وأنتظر عودتكم في الشرفة كالعادة، أجلس مع فنجان الميرمية، أرقب مرج ابن عامر، وأقول.. هذه الحياة جميلة
والموت كالتاريخ..فصل مزيّف”

الحرب ضد سرطان الثدي مرهقة وكل واحدة بتدخل الحرب دي بتكون بطلة، في بطلات بتنتصر في الحرب دي وفي بطلات بتستشهد في نص المعركة وبتسيبنا. دايماً الشهيدات بيسيبوا بصمة في العالم وبيعلمونا حاجات كتير عن الحرب والبطولة. الفحص الذاتي اهم سبب في اكتشاف المرض في مرحلة مبكرة. وده بيزود فرص الشفاء لـ 98%. علشان تعرفي ازاي تعملي الفحص الذاتي اقري مقالتنا عن الفحص الذاتي. اضغط هنا للقراءة.