في القضايا اللي بيثور فيها المجتمع و بيبقا فيها اجماع ان فيه شخص معين هو اللي غلطان و لازم يتعاقب و التاني مظلوم و خصوصا لو قضايا قتل، بيكون الحكم بالعقل و القانون اصعب و ابطأ بالنسبة للناس لان بيكون غالب مشاعر الاحساس بظلم الطرف المظلوم.

و عشان كده بتكون القضايا دي فرصة لانتشار الشائعات عشان تسخن الناس على اي حاجة و للاسف اغلبنا بيصدق و بيشير الاخبار المفبركة دي و مبيرجعش للمصدر الرئيسي للمعلومة. زي ما حصل النهاردة في قضية سفاح الاسماعيلية.

بس قبل ما ندخل في التفاصيل، خلونا الاول نكون عارفين في اي قضية مين بيكون الاطراف قدام المحكمة. الطرف الاول بيكون المتهم و المحامي بتاعه اللي اكيد في اي قضية بيكونوا عايزين براءة، اما الطرف التاني فا هي النيابة العامة اللي حققت في القضية و قررت ان خلاص المتهم ده المفروض يتعاقب و يروح للمحكمة و هي اكيد مش شايفة المتهم بريء.

و المحكمة بتكون الطرف اللي في النص اللي بيسمع كل الاطراف و يحكم بالقانون، و بتدي فرصة بعد اصدار الحكم ان اللي مش عاجبه الحكم و معترض عليه حقه يقدم حاجة اسمها طعن بيقول فيها اسباب اعتراضه على الحكم و المحكمة بتشوفه كمان و على اساسه بيبقا فيه قرار سواء ان الحكم زي ما هو او هيحصل تغيير.

النهاردة بقا حصل ايه في جلسة سفاح الاسماعيلية؟

النهاردة كان فيه جلسة حكم في محكمة جنايات الاسماعيلية في قضية عبد الرحمن نظمي محمد إبراهيم (سفاح الاسماعيلية) في قضية تعاطي المخدرات قبل ارتكاب الجريمة اللي اعترف بتفاصيلها المتهم نفسه.

المحكمة برئاسة المستشار هاني فتحي عباس مطاوع، حكمت عليه ب 3 سنين سجن مشدد في قضية التعاطي بعد 45 يوم من الحكم عليه بالإعدام في قضية قتل مواطن في الشارع و كمان دفع 100 ألف جنيه  لأسرة المجني عليه و دفع 200 جنيه مصاريف الدعوى و ده كان في 5 يناير 2022.  

اومال فين حكم الاعدام ده متنفذش ليه؟ بعد الحكم انتشر شائعات بتقول ان مجمل الاحكام 3 سنين مشدد بس و كده خلاص مفيش اعدام. لكن الحقيقة ان فيه سوء فهم حابين نوضحه

قضية التعاطي هي من ضمن قضايا تانية بيتحاكم فيها سفاح الاسماعيلية، و من ضمنها قضايا قتل مواطن في الشارع بسلاح ابيض و شروع في قتل مواطنين تانيين في شارع في محافظة الاسماعيلية. والحكم بتاع النهاردة ده مبينفيش حكم الاعدام و ملوش علاقة به ابدا، هي اتهامات متوجهة له و بيتحاكم فيها بغض النظر عن اي حاجة لحد ما يتم الفصل في حكم الاعدام.

فصل في حكم الاعدام ازاي؟ هو مش حكم طلع خلاص!

ده حقيقي الحكم طلع خلاص و بالنسبة للمحكمة ده كان قرارها بس كمان من حق المتهم اللي هو سفاح الاسماعيلية و المحامي بتاعه انهم يقدموا طعن في الحكم ده للمحكمة في خلال 60 يوم من صدور حكم الاعدام و يكون زي اعتراض ليهم على الحكم، فا مينفعش الحكم يتنفذ قبل الفترة دي ما تخلص و دلوقتي فات منهم 45 يوم بس.

طب لو خلصوا ال 60 يوم و محامي المتهم مطعنش على الحكم؟ هنا النيابة و هي الطرف التاني في القضية قدام المحكمة هي اللي بتطعن في الحكم و هنا مش هيكون اعتراض عليه، لكن الطعن هنا هيكون زي اجراء لابد منه عشان يتم مراجعة اوراق القضية و يتأكدوا ان اسباب المحكمة في حكمها بالاعدام مفيهاش اي حاجة غلط و ان خلاص الاعدام مفيش غيره هيتنفذ خلاص.

فاضل 15 يوم و هنعرف الحكم النهائي على سفاح الاسماعيلية اللي نظريا كل الادلة ضده لكن في النهاية هي اوراق قدام المحكمة بتنظر فيها عشان توصل لحكم عادل و قانوني بعيد عن المشاعر.

في النهاية المفروض كلنا نقف ضد الشائعات دي و ناخد الاخبار من مصدرها الحقيقي. لأن القانون المصري دايما في صف المظلوم و عمر ما قاتل زي سفاح الاسماعيلية ممكن يفلت من العقاب.