خبر صدور المسلسل الجديد راتشيد (Ratched) اللي هيبدأ عرضه 18 سبتمبر 2020 علي نتفلكس مكسر الدنيا بين فانز الرعب في كل مكان. المسلسل بطولة سارة بولسون وشارك في الإخراج والكتابة ريان مورفي.

النجمين تعاونوا قبل كدا في سلسلة مواسم American Horror Story، واللي كانت واحدة من أهم مسلسلات الرعب في العشر سنين اللي فاتو.

والسؤال اللي كل فانز السلسلة دي بيسألوه: هل المسلسل الجديد هو تكملة لسلسلة AHS، ولا مسلسل جديد خالص؟

انتاج قوي ومشاهد اخر رعب وشياكة

اللي عرفناه ان أحداث المسلسل الجديد بتدور في أواخر الأربعينات 1947. وواضح في الإعلان أن الأزياء وطريقة التصوير والألوان والفلاتر المستخدمة، خدمت ثيمة الفترة الزمنية دي كويس جداً بحيث انها رجعتنا فعلا للفترة دي لدرجة تحسسك أنك عايش فيها.

الأزياء اللي سارة بولسون لبستها في مشاهد الإعلان كانت شيك ومظبوطة أوي علي موضة الفترة دي، وده بيوعدنا بكوتيور أربعيناتي وخمسيناتي جميل على مدار المسلسل كله.

اعلان مكسر الدنيا مليان رعب نفسي وأحداث مش طبيعية

(راتشيد) اللي بتقوم بدورها سارة بولسون هي ممرضة بتشتغل في مصحة أمراض نفسية وعقلية، بتحصل فيها أحداث/ تجارب مش طبيعية. وتقريباً ده اللي هيكون العنصر الدافع للدراما والرعب في المسلسل.

اعلان المسلسل مشحون بأجواء رعب نفسية بتفكرنا فعلا بالأجواء العامة لمسلسل AHS. نفس الأجواء المغيمة والفلاتر المصفرة ودرجات الألوان المتقاربة في الخلفية اللي بتعمل ارتباك في المشاعر بيخلق حالة الرعب المميزة للمسلسل.

  AHS قصة جديدة خالص ولا تكملة لسلسلة

بناءاً علي تصريح من ريان مورفي: المسلسل ملوش أي علاقة بأي من مواسم AHS. وأنه بيحكي قصة الممرضة راتشيد من فيلم one flew over the cuckoo’s nest. 

اللي ميعرفش الفيلم ده، فهو فيلم من بطولة جاك نيكلسون. الفيلم اخد خمس جوايز اوسكار في سنته وكان واحد من أعظم اداءات جاك نيكلسون في تاريخه.

الممرضة راتشيد في الفيلم كانت الشخصية الشريرة اللي بتستمع بتعذيب المرضى بتوعها، وكانت بتعذب شخصية جاك نيكلسون في الفيلم وبتكرهه جداً.

شخصية أيقونية وأداء يستاهل جولدن جلوب

أما في اعلان المسلسل فكانت مشاهد راتشيد (سارة بولسون) بتوحي أننا في انتظار ايقونة شر جديدة. نظراتها وطريقة كلامها وتعبيرات وشها فعلا تخوف. وفي نفس الوقت تستحق الإعجاب. عندها كاريزما ايقونية هتقدر تخدم التوازن المثالي اللي بيخلق شخصية الشرير المحبوب في الدراما.

أداء سارة بولسون عبقري لحد دلوقت. أداء هادئ وحكيم وفي نفس الوقت مشحون بالمشاعر. تقدر تشوف غليان المشاعر تحت الوش الهادئ اللطيف ده. لو أداء سارة بولسون في المسلسل بالكامل كان بالجمال ده، فالجولدن جلوب مستنياها بدون شك.

اعلان تاني وحكاية قديمة تستاهل تتحكي ومحدش فكر يحكيها

بناءا علي تصريح تاني من رايان مورفي: مسلسل Ratched بيحكي عن ازاي الممرضة راتشيد اتحولت للكائن السادي الشرير اللي كان في الفيلم. وازاي الانسان الشرير بيتولد ويتكون. يعني هتكون عبارة عن رحلة مرعبة جوا عقلية الشرير.

وده برضه كان واضح جداً في الاعلان التاني للمسلسل اللي اتكلمت في جزء منه عن طفولتها وعلاقتها بوالديها اللي سابوها وهي طفلة. والتغيرات الدراماتيكية ما بين مشاهد بتكون فيها كائن وديع ولطيف جداً ومشاهد تانية بتتحول فيها لكائن شرير ووقح ومؤذي.

شوف الإعلان التاني هنا: 

رغم تصريح رايان مورفي أن مسلسل راتشيد ملوش علاقة بـ AHS، لكن مش معني كدا اننا خلاص مش هنشوف اي حاجة جديدة من AHS. لسه ريان مورفي نازل بأعمال كتير خلال سنة 2020 و2021، وممكن يكون بعضها استكمال لـ AHS.

أو حتي اعمال جديدة بأحداث تتشابك مع AHS.