Omar Bakry
مكنتش عمري اتخيل ان فيه حاجة اهم من صلاح عند الشعب المصري و مكنتش اتخيل ان لو فيه حاجة هتكون اهم بالنسبة للناس هتكون هي المانجو مثلا مش الاكل العادي دي فاكهة.. و لكن شكلي كنت فاهمنا غلط و مطلعتش لوحدي اللي كان بيدور على المانجو على جوجل.
ليه بقا المانجو هي الكلمة الاكثر بحثا السنادي على جوجل في مصر؟
في عز موسم المانجو في الإسماعيلية و عز استخدام اسمدة مغشوشة و بسبب تغيرات الجو الفظيعة اللي شوفناها كلنا حصل هجوم على مزارع المانجو من “العفن الهبابي” اللي بوظ% 90 و 95% من محاصيل المزارع و دمر الاشجار في الاسماعيلية و بعض مدن القناة.
والعفن الهبابي هو مرض ينتج عن نمو بعض الفطريات الرملية على المادة العسلية اللزجة التي تتركها بعض الحشرات على أوراق المانجو
هي المانجو مبتتزرعش غير في اسماعيلية يعني؟
بتتزرع طبعا بس اغلب المانجو اللي بناكلها بتبقا من الإسماعيلية و احلى مانجو هي اللي بتيجي من هناك فعلا عشان تربة الارض مناسبة لزراعتها اكتر من اي مكان تاني. و لكن ده مكنش سبب اننا نتحرم منها طول موسم الصيف اللي فات هي كانت فترة في الاول بس كانت قليلة لكن اكلناها كتير بس سعرها كان اغلى شوية عن الطبيعي
عرفتو بقا ان المانجو في الصيف اللي فات كانت اهم من محمد صلاح عند المصريين؟
تعالوا بقا نعرف شوية تاريخ عن اول مانجو في مصر
خلال وجود الزعيم عرابي في منفاه بجزيرة سيلان بجنوب اسيا اتعرّف على فاكهة مشافهاش قبل كده في مصر و هي فاكهة المانجو، ذاقها و عجبه طعمها وقرر انه يبعت لأحمد باشا المنشاوي، أحد أعيان محافظة الغربية، بذورها عشان يزرعها. وبالفعل احمد باشا المنشاوي اشترالها ارض كبيرة و زرعها و استمر الحال على كده فترة كبيرة لحد ما عاد عرابي من المنفى سنة 1903، و جاب معاه شجرة مانجو وأهداها لصاحبه المنشاوي و لسه الشجرة موجودة لحد دلوقتي في الغربية. وبعد انتشار صيت المانجو الفاكهة الجديدة علينا في مصر، اتسابق الناس عليها عشان يهادوا بيها اصحابهم و قرايبهم.
و المانجو اصلها فاكهة هندية و دي بعض فوائدها
- وقاية من السرطان
- تثبت نسبة الكوليسترول
- تنظم نسبة السكري
- تساعد في عملية الهضم
