في ٢٠١٧ لما نزل فيلم Split لأول مرة، بدأت الناس تتكلم عن البطل اللي بيعاني من انفصام الشخصية وعايش مع ٢٤ شخصية مختلفة جواه. ورغم أن الممثل جيمس مكفوي ظهر في أداء مبهر للشخصية، إلا أن كل الكلام كان متوجه ناحية سؤال مهم جداً:

هل الاضطراب ده حقيقي ولا من وحي خيال الكاتب؟

Split القصة الحقيقة اللى شغلت العالم لفترة طويلة

عام 1975 تم القبض علي بيلي ميليجان بتهمة اغتصاب تلات بنات في حرم جامعة أوهايو. البنات التلاتة اتعرفوا علي بيلي وتم توجيه الاتهامات ليه وسجنة كمدان بقضايا الاغتصاب دي.

الغريب أن واحد من الأطباء النفسيين طلع بتشخيص مثير للجدل، أدعي أن بيلي ميليجان مصاب باضطراب نفسي سماه “متلازمة الشخصيات المتعددة”. وقال في التشخيص أن المريض متعايش مع 24 شخصية مختلفة بتتحكم في جسمه وأن وعي كل شخصية فيهم منفصلة عن باقي الشخصيات تماما. يعني لما شخصية منهم بتتحكم في جسم بيلي باقي الشخصيات بتكون في حالة سكون و مبتعرفش أي حاجة من اللي حصل مع الشخصية اللي ظاهرة.

في الصورة اللي تحت، بيظهر بيلي ميليجان (شخصية Split الحقيقية)  علي اليمين والمحامي بتاعه علي الشمال

طبعاً التشخيص ده في وقتها كان غريب عن الطب النفسي ومثير جداً للجدل، ولكن ورغم كدا المحامي قدر يستخدم الحجة دي خلال مرافعته الدفاعية عن بيلي. المرافعة كلها كانت عن ان بيلي ميليجان مكانش متحكم في جسمه في وقت وقوع الجريمة وأنه شخصيته الحقيقية كانت في حالة سكون لمدة سبع سنين، في الوقت ده كانت الشخصيات التانية هي اللي بتتحكم فيه. وبالفعل قدر يطلعه براءة وبدل السجن تم إدخال بيلي لمصحة نفسية.

بيلي ميليجان: مريض نفسي ولا مجرم شاطر عرف يفلت من العقاب؟

عام 1977 كان بيلي أول شخص يتم تبرئته من جريمة ارتكبها بالفعل بحجة المرض العقلي، وأول واحد يتم تشخصيه بمتلازمة الشخصيات المتعددة.

بعد المحاكمة قضي بيلي كل حياته في المصحات النفسية لحد ما مات سنة 2014. في المصحات النفسية تم الكشف عن 10 من شخصيات بيلي.

شخصيات بيلي الـ 24 مكانش مسموح ليهم كلهم بالوجود في جسمه. معظم الشخصيات كانت مجبرة تفضل في حالة سكون بأمر من شخصيتين، هنتكلم عنهم بعدين.

الشخصيات العشرة اللي كان مسموح لها بالظهور

١- بيلي ميليجان: الشخصية الأصلية. شخص خجول ومواطن مثالي.
٢- أرثر: ارستقراطي انجليزي لبق ومثقف. خبير في الطب والعلوم. واحد من ضمن شخصيتين ليهم تحكم كامل في تحديد الشخصيات اللي مسموح لها تظهر.
٣- راجين: بلطجي. بيوصف نفسه أنه يوغسلافي الجنسية. اعترف بارتكاب جريمة سرقة كبيرة وانه اشتغل حارس شخصي لتاجر مخدرات ولكن انكر جريمة الاغتصاب. بيتكلم وبيكتب باللغة الصربية بطلاقة. جسمه قوي جدا وبيبان ده علي بيلي لما بيسيطر عليه، كأن جسمه بيتحول.
٤- ألين: فهلوي، بيعرف يتكلم ويتعامل مع العالم الخارجي ولمض. محترف يعزف على الطبلة ورسام. والغريب أكتر انه كان بيستخدم ايده اليمين في الكتابة على عكس بيلي وباقي الشخصيات اللي كانت بتستخدم ايدها الشمال. كان الوحيد اللي بيدخن.
٥- تومي: فنان في الهروب والتنكر. موهوب في الساكسفون وخبير في الإلكترونيات، ومفيش تفسير ازاي عقل بيلي علم نفسه كل ده من غير ممارسة.

الشخصيات الوديعة، اللي نقدر نقول عليها سلبية

٦- ديفيد: حارس الالم. بيظهر علشان يتعامل مع الألم النفسي أو الجسدي اللي بيتعرضله بيلي، واللي مكانش بيقدر يتعامل معاه.
٧- داني: مريض بالخوف من البشر والرجالة تحديدا… بيرسم رجالة بس.  وده لانه قال ان كالمر ميليجان، جوز امه، عقده من الرجالة لما أجبره يحفر قبر بأيده ويدفن نفسه فيه. مفيش أي اضافات قدرنا نحصل عليها من بيلي عن القصة دي.
٨- كريستين: بنت عندها ٣ سنين، ظهورها كان مقتصر علي أيام المدرسة، وهو طفل، علشان تتعاقب مكانه.
٩- كريستوفر: اخو كريستين.  بيعزف علي الهارمونيكا بحرفية.
١٠- أدالانا: بنت مثلية. طباخة شاطرة و بتنضف البيت.هي اللي اغتصبت البنات بتوع الجامعة بحجة انها كان نفسها تحس بالقرب من حد. اعترفت بالجريمة والمحكمة وجهتلها التهمة ايام القضية. ودي الجريمة اللي فيلم Split احداثة بتتكلم عناه. الشخصية رغم انها مجرمة الا انها تعتبر شخصية سلبية.

باقي الشخصيات الـ 14 مكانش مسموح لها بالظهور لأنها كانت مندفعة وخطر علي سلامة بيلي.

اهم اتنين في الشخصيات الممنوعة من الظهور

كيفن: العقلية الاجرامية اللي بتخطط للسرقة.

المُعلم: ودي اهم شخصية اتكونت في وعي بيلي. حصيلة كل قدرات الشخصيات التانية مع بعض. هو اللي بيتحكم في ظهور الشخصيات التانية بمساعدة أرثر. ورغم انه مكانش بيظهر علي سطح وعي بيلي، الا انه كان دايما في الخلفية موجود كمخرج لوعي بيلي.

شخصيات بيلي ميليجان في السينما

المخرج “نايت شالامان” كان قرر يعمل فيلم عن بيلي ميليجان من وقت طويل. وكان قرر يسمي الفيلم Split من البداية. لكن الفيلم اتاخر بسبب مشاكل في الانتاج. اللي كان المفروض يعمل الشخصية الرئيسية في Split هو ليوناردو ديكابريو بس للأسف ده محصلش. رغم كدا جايمس ماكفوي عمل اداء كويس جدا.

شالامان اختار كيفين علشان يكون الشخصية الرئيسية واللي بيظهر في معظم أحداث الفيلم.

ويظل السؤال: هل الاضطراب ده حقيقي ولا بيلي عرف يضحك علينا كلنا؟

الحقيقة لحد دلوقت في جدل حول تشخيص بيلي ميليجان. بعض الأطباء النفسيين بيقولو انه دجل وكذب وبعضهم بيقولوا انه ممكن يكون حقيقي. بعد 1977 حصلت طفرة في أعداد الناس اللي تم تشخيصهم بالمرض بعد بيلي. ولكن في 1994 رابطة الاطباء النفسيين غيرت اسم الاضطراب لـ متلازمة اختلال ازدواج الهوية. وتم وضع معايير صارمة للتشخيص واللي بعدها قلت أعداد الناس اللي بيتم تشخيصهم بالمرض بشكل كبير جدا.

لحد دلوقتي محدش عارف اذا كان بيلي ميليجان فعلا مريض نفسي ولا مجرم شاطر عارف يلعب علينا لعبة ذكية.