أمير المصري موهبة مميزة بتفرض نفسها على ساحة الفن والسينما، فعلى الرغم من سنه الصغير إلا إنه عرف يشارك في مجموعة من الأفلام المهمة والعالمية ويعمل Profile كويس لنفسه.

ودليل على كدة إنه بينافس في مهرجان القاهرة السينمائي الدولي في دورته الـ42 بفيلمه العالمي الجديد Limbo اللي من المقرر عرضه يوم 9 ديسمبر، واللي كان جزء من الاختيار الرسمي في مهرجان كان السينمائي في بداية 2020 وفاز بجائزة لجنة تحكيم الشباب TCM Youth Jury Award في مهرجان سان سيباستيان.

ومش بس كدة ده كمان تم اختياره ضمن قائمة بافتا البريطانية للمواهب الصاعدة BAFTA Breakthrough وهي جوائز تقام سنوياً من قبل الأكاديمية البريطانية لفنون الفيلم والتليفزيون لدعم المواهب الجديدة وتسليط الضوء عليها. وهي الشبيه البريطاني لجوائز الأوسكار.

فكانت بداية أمير المصري في رمضان مبروك أبو العلمين حمودة والثلاثة يشتغلونها وبعد كدة انتقل للعالمية من خلال عدد من الأفلام الأجنبية زي Rose Water وThe Night Manager وLost In London وStar Wars: The Rise Of Skywalker وغيرها…وآخرها Limbo.

تعالوا نروح في جولة كدة بسيطة عشان تعرفوا أكتر عن نشأة أمير المصري وعن رأيه في مواضيع كتير اتكلمنا عنها في حوارنا معاه.

اتولد في القاهرة ونشأ في لندن، ودرس في جامعة رويال هولواي وتخصص في دراسة الـCrimnology أو علم الإجرام. ولأنه زي ماقالنا:

“حبيت التمثيل من وأنا عندي سبع سنين”.

عشان كد حب يكمل في الطريق ده بطريقة أكثر احترافية بعد ما كان شارك بالفعل في فيلمين هما رمضان مبروك أبو العلمين حمودة والثلاثة يشتغلونها، ودخل معهد تمثيل London Academy of Music and Dramatic Arts أو LAMDA.

وكانت أكاديمية LAMDA هي وش الخير على أمير المصري، لأنه وقع عليه الاختيار أثناء تأديته لمشروع التخرج، من قبل فريق عمل فيلم Rose Water للمخرج جون ستيوارت، وبالفعل عمل تجربة أداء للفيلم.

“بعدها بأسبوعين قابلت جون ستيوارت شخصياً وكنت مرعوب وأنا واقف قدامه وماسك الـScript ولقيته بيقولي عندك لبس خفيف؟ فمكنتش فاهم قصده…قالي بعدها أصل الجو هيبقى حر في الأردن فعرفت اني اتقبلت!”.

كان رد فعل جون ستيوارت مفاجأة لأمير اللي كان عنده 23 سنة بس في الوقت ده وده كان أول فيلم ليه في هوليوود.

وأكد أمير في كلامه إنه كان بيتمنى دايماً إنه يشتغل في مصر ويقدم أعمال فيها ولكن كان في نفس الوقت بيحلم إنه يوصل للعالمية. وشغفه الأساسي إنه يقدم أفلام بتعبر عن قضايا إنسانية وعن حياة الناس اليومية، وكمان بيحب القصص المبتكرة والممتعة زي اللي قدمه في فيلم Star Wars: The Rise Of Skywalker.

بيحرص أمير المصري دائماً على إنه يقدم أنواع متنوعة تماماً ما بين الأدوار المسرحية والأكشن والكوميدي والأفلام القصيرة. وبرغم صعوبة إنه ينقل من شخصية لشخصية لتنوعها، قال لفريق عمل El-Shai :

“بحاول دايماً في أي دور بعمله حتى لو كان بعيد تماماً عن شخصيتي، إني أتعاطف معاه خاصةً لو كان شخصية شريرة لازم أدور على أي حاجة إنسانية في الموضوع وليه الشخصية دي اتجهت للطريق ده سواء كان في الكوميدي أو الأكشن أو الدراما… وساعات مش بيبقى سهل إني أفصل من الشخصية أو أشيل القناع اللي بلبسه لشخصية معينة والموضوع ممكن ياخد وقت عاشان أرجع لطبيعتي”.

وكمل وقال:

“بغض النظر عن اختلاف الشخصيات اللي بعملها طريقتي في التحضير ليها بتبقى واحدة، بعمل بحث على الشخصية لو حقيقية أولأ بشوف فين الحاجات المهمة وإيه الفترة اللي كانت الشخصية عايشة فيها والدنيا كان شكلها ايه ساعتها. وكنت محظوظ جدا إني أقابل شخصيات حقيقية ويحكولي عن تجاربهم الشخصية، استفدت كتير جداً منهم وبقى عندي ثقة كبيرة اني أجسدهم”.

زي في فيلم Limbo اللي بيجسد أزمة اللاجئين، وبيحكي عن شاب موسيقي راح لندن عشان يقدم طلب لجوء. فكان عبارة عن دمج لحياة الناس اليومية،

“كان لازم أقابل النوعية دي من الناس وأعرف أكتر عنهم وعن حياتهم واللي كانوا بيواجهوه. بس احنا كمصريين من عادتنا إننا نضحك على أي مشكلة بتواجهنا ودي طريقتنا في الخروج من الأزمات. فكنت عايز أطبق ده في النص إن إحنا بنضحك في أسوأ الظروف وأنا بجد فخور جداً بمشاركتي في فيلم زي ده”.

ووضح أمير المصري إن فيلم Limbo مكنش عبارة عن تجسيد لفكرة أهمية الغرب وإزاي هما اللي أنقذوا حياة الشاب العربي ده وخرجوه من أزمته، بالعكس كانت شخصية عمر هي اللي بتقرر كل الأحداث وهو المسؤول عن كل اللي بيحصل خلال الفيلم. وقال:

“إن الفيلم ده بيوضح للناس ويفكرهم إن في فكرة سائدة في أوروبا إن العرب بيسافروا هناك علشان بيدورا على بلد أحسن من بلادهم، بس ده مش صحيح تماماً بالعكس دول كانوا عايشين اسلوب حياة أحسن بكتير هما بس اضطروا إنهم يمشوا من بلادهم لحد ما الظروف تتحسن ويرجعوا تاني”.

وخلال كلامنا معاه وبمناسبة الحديث عن الحياة في أوروربا، كنا عايزين نعرف أكتر عن العنصرية اللي ممكن يكون بيواجهها أمير وإنه يخرج من كادر تمثيل الشخص العربي الإرهابي وإنه يمثل شخص عادي جداً.

“لازم يكون عندك القدرة امتى توافق على شخصية وامتى ترفضها، وعشان تقدر تستمر في المجال ده لازم تستحمل وتقبل فكرة إنك هتترفض كتير…ولما تقدر تعدي كل العقبات اللي واجهتك ساعتها بس الناس هيبتدوا يشوفوك بطريقة مختلفة”.

أمير المصري كان فعلاً محظوظ إنه قدر يجسد شخصيات مختلفة وكانت بعيدة تماماً عن أدوار الإرهابيين المعتادة. ففي الكام سنة اللي فاتو قدم مجموعة من الأدوار اللي مكانتش لشخصيات عربية، زي شخصية بنجامين وهي شخصية انجليزية هنشوفها في مسلسل جديد هيتعرض على Netflix في 2021.

“كان من الصعب جداً الحصول على دور زي ده علشان أنا مصري وشكلي عربي، فكان لازم اشتغل بجهد أكبر من أي حد تاني لأني كنت مع ناس تانية في تجارب الأداء شفت إنهم ممكن يكونوا مناسبين أكتر للدور من ناحية الشكل…فكان لازم أقدم حاجة زيادة علشان… طبعاً المنتجين مش هيقولوا أنا عايز شكل مصري، بس صناع الأفلام وأصحاب القرار هتعجبهم فكرة إنه مشافنيش قبل كدة بس عرفت أثبتله إني أستحق الدور ده فبالتالي ممكن أعمل أدوار تانية ويبقى قدامي فرص كتير.

وبرضو قدمت أدوار شر وعملت دور إرهابي، ووافقت ساعتها بس لأنه كان شخصية حقيقية مش مجرد إرهابي بمثله وخلاص علشان أنا عربي. وكان مهم عندي ان الناس متتعاطفش مع شخصية عديمة الأخلاق ولكن لازم نفهم ليه اختاروا الطريق ده عشان نقدر نمنع ده في المستقبل”.

واتكلمنا أكتر مع أمير المصري عن فيلمه العالمي الجديد Limbo اللي أنتجته شركة Film4. وحكى لنا عن قد إيه تجارب الأداء مكانتش سهلة واستمرت لفترة طويلة جداً…

“كانوا في الأول مرشحين اسم نجم كبير جداً مش هقدر أقول اسمه ولكن بن شاروك مخرج الفيلم قال عليه إنه مش مناسب للدور علشان سنه كبير وكان عايزني أنا ألعب الدور ولكن في كتير من فريق العمل كانوا معترضين علشان أنا مش معروف أوي لسة. بس بن كان ليه نظرة تانية بإنه يختارني للدور. أنا فعلاً مبسوط جداً إنه آمن بيا وأتاح لي فرصة زي دي”.

اتحمس أمير جداً للدور من اللحظة اللي قرا فيها النص وحب إنه يستغل الفرصة دي وينجح فيها وده اللي حصل فعلاً.

“مكناش نعرف إن الفيلم هينجح بالشكل ده ويدخل مهرجانات كان وTIFF وسان سيباستيان، ويكسب TCM Youth Jury Award ويحتل المركز التاني في London Film Festival لأحسن فيلم”.

وحرص أمير إن فيلم Limbo يتعرض في مصر ويدخل مهرجان القاهرة السينمائي اللي اتحمسوا جداً لما شافوا الفيلم. فكان دائماً بيحلم إنه يبقى بطل فيلم عالمي وينجح في إنه يعرضه في بلده ويشاركه مع الجمهور المصري. وبالفعل قدر يعمل كدة بسبب اجتهاده وطموحه.

Production: El-Shai.com

Photography: Raghda El Sayed @raghda.a.elsayed

Stylist: Maria Fathy @mariainthelayout

Assistant stylist: Hiba Shabana @hibashabanastudio

Makeup: Youmna Katary @makeupbyyomnakatary

Assistant photographer: Shady Geroge @i.shadygeroge

Videography: Moe Hamdy @moeshoots__

Location: Grand Nile Tower