خبر صدور فيلم زي الخطة العايمة ممكن يعدي علينا من غير ما ناخد بالنا. هنقول أهو فيلم عربي جديد وممكن منهتمش، بس أحنا متحمسين جداً للفيلم ولازم نشوفه. وهنقولك أنتا كمان لازم تشوفه ليه.

شوف التريلر كدا وكمل معانا

كوميديا جديدة مش متعودين عليها

 الفيلم من تاليف كتاب جداد في الكوميديا، احمد عبد الوهاب وكريم سامي “كيمز”. يعني هنشوف شكل جديد من الضحك مختلف عن أي حاجة اتقدمتلنا قبل كدا. واحنا متحمسين أوي لروح الكوميديا الجديدة دي علي الشاشة.

على ربيع وعبد الرحمن توتة، نجوم مسرح مصر، هيظهروا بشكل مختلف عن الكوميديا اللي متعودين يقدموها في مسرح مصر.  شغل ربيع وتوتة في مسرح مصر والأعمال التانية اللي قدموها بعده ادتهم خبرة تسمحلهم يقدموا موضوع حيوي وكوميدي في نفس الوقت. واحنا متحمسين أوي نشوف دا علي الشاشة.

الخطة العايمة جايبلنا قصة جديدة جامدة وضحك مضمون

قصة الفيلم بتتكلم عن عميان هيسرقوا بنك. الفكرة جديدة ولذيذة، ومادة كوميديا غنية جداً، لو اتنفذت حلو وأخدت حقها هتطلعنا فيلم جميل جداً والضحك هيبقي للركب.

ده غير أن الفيلم مشارك فيه عمرو عبد الجليل وبيومي فؤاد وصلاح عبد الله يعني النجوم التقال اللي بيموتنا من الضحك، فكده كده هندخل الفيلم هنضحك، حاجة واخدينها في جيبنا وأحنا داخلين الفيلم.

غادة عادل تمنح الخطة العايمة المزازة التي يحتاج إليها

كل فيلم حلو محتاج مزة حلوة! معروفة يعني. ومين أمز من غادة عادل؟ الحقيقة دا موضوع شائك ومش عايزين نفتح باب الجدل. بس المهم أن غادة هي المزة الجامدة اللي محتاجها كل فيلم جامد.

طبعاً دا إلي جانب أن غادة ممثلة شاطرة جداً وكل أدوارها محفوظة في دماغنا. يعني نجمة تقيلة وفيلم تقيل مش بس كوميديا وجمال ولذاذة ومزازة. وكمان من اخراج  معتز التوني. لو متعرفش مين التوني، يبقي لازم تشوف مسلسل اللعبة، مش هنقول غير كدا … يعني من الأخر كدا الفيلم ده جامد!!

الفيلم الحلو يستوي علي نار هادية! واللي يصبر؟ ياخد حاجة نضيفة

احمد عبد الوهاب وكريم سامي “كيمز”، اللي كتبوا سيناريو الفيلم، أخدوا أربع سنين في الكتابة قبل ما يقرروا أن السيناريو مناسب للإنتاج. وده دليل علي أن عملية الكتابة أخدت وقتها اللي تستحقه وأن المحتوي السينمائي في السيناريو طلع نتيجة بحث وتدقيق، مش مجرد حاجة مسلوقة علي السريع، زي حاجات كتير شوفناها. وعلشان كدا أحنا متحمسين جداً نشوف أول سيناريو لعبدالوهاب وكيمز.

ولما يكون أول سيناريو للكاتبين بالانتاج القوي ده وبمشاركة ممثلين جامدين، حققوا نجومية كبيرة وليهم وزنهم في السينما، يبقي معني كدا أن المنتجين واثقين في الفيلم ومتأكدين أن شغل كيمز وعبدالوهاب يستاهل. وأحنا كمان واثقين من كدا وهننزل نشوف الفيلم معاهم.

لو بتحب الكوميديا يبقي أدخل فيلم الخطة العايمة وأنتا متطمن أنك هتضحك. لو ليك في الأكشن هتلاقي أكشن وسرقة بنوك وضرب نار. ولو بتحب الدراما، هنعيطك. أما لو بقي كنت بتحب الجمال، فهتلاقي الجمال كله.