in

لبدنك عليك حق – 5 حاجات مهمة بخصوص صحة الجسم

لو مش هتاخد بالك من صحة جسمك، ازاي جسمك هياخد باله منك؟

woman spreading both her arms stockpack pexels scaled
woman spreading both her arms stockpack pexels scaled

معظمنا مش بياخد باله من عادات كتير فيها تقليل من صحة الجسم. كمية أعذار بنقولها لنفسنا لا حصر ليها زي انا لسه صغير، ايه يعني لما اسهر لحد الصبح، ايه مشكلة اني اشرب ده او آكل البيتزا دي لوحدي مانا مضايق. وهكذا. طبعا أنا بتكلم عن نفسي، وممكن فيه كام حد فيكوا يبقى عندوا الأفكار دي. جملة “لبدنك عليك حق” مش راضية تطلع من دماغي بقالها شوية وخلتني أفكر كتير في عاداتي وأسلوب حياتي.

هو احنا فاكرين نفسنا بنضحك على مين؟ فكر فيها شوية، لما بتسوق عربيتك من غير ما تعملها صيانه بتفتحلك بقها. تخيل بقا لما ده يكون جسمك انت اللي شايلك طول حياتك. الكام نقطة اللي تحت دول شوية أفكار ممكن يغيروا نظرتك لطريقة معاملتك لجسمك

الدايت وسنينه

كلنا في وقت ما من حياتنا بنسيب نفسنا ووزننا بيزيد شوية. بناخد بالنا لما مبندخلش في هدوم الصيف أو لما حد يقوللنا اننا تختخنا. فيه ناس بتعيش معظم حياتها بتعاني من مشكلة الوزن سواء تحت أو فوق الوزن المناسب. وبعيدًا عن المشاكل النفسية اللي بتأدي لمشاكل في الأكل، ليه بنفشل في اننا نتبع نظام تغذية جيد؟

ممكن لأننا بنشوف ان الدايت عبارة عن وسيلة عشان نوصل بيها لهدف معين. مش بنشوف ان التغذية الصحية اسلوب حياة أو ان جزء من الحفاظ على صحة الجسم هو الأكل الصحي. مش هقوللك عيش حياتك بتاكل بروكلي مسلوق وفراخ مشوية. لكن حاول ان نظام أكلك يكون متوازن. خير الأمور الوسط. مش كل يوم ناكل وجبات سريعة، بلاش أكل بلليل علشان خاطر الجهاز الهضمي ووظايفه قبل ما نفكر في التخن

التمارين الرياضية

في الحركة بركة، جملة بتعدي علي وداننا بس مبنركزش فيها. سيبك من فكره اللياقة البدنية اللي كلنا عارفين ان التمارين الرياضية بتسهم فيها بشكل كبير. حاول تركز كده في الحالة النفسية لشخص أسلوب حياته فيه حركة كبيرة في شغله وبيتمرن رياضة من اختياره وشخص تاني قاعد ورا مكتب طول النهار وبيرجع البيت يأنتخ ويتفرج بالساعات على مسلسلات وأفلام من غير ما يتحرك نهائيا. أكيد هتلاقي فرق كبير

فكرة “معنديش وقت اني امارس رياضة فيه” هو عذر بنقوله لنفسنا عشان منحسش بالذنب اننا مبنتحركش. ممارسة الرياضة مش شرط تكون في جيم أو ملعب. ممكن تختار انك تعمل مشاوير البيت وتاخد السلم طالع نازل، ممكن تاخد مواصلات عامة وتمشي شوية بدل ما تاخد تاكسي  ينزلك لحد باب الشغل. حاجات صغيرة زي دي هتأدي لتحسن في صحة الجسم

المشاريب إياها

النقطة دي بالذات هي نقطة مثيرة للجدل شويتين. قصة الشرب نوعا ما مربوطة بفكرة انك روش او اجتماعي وده بسبب السوشيال ميديا واللي عملته حسابات عليها بتروج لحفلات وسهرات مليانة صور فيها مشروبات روحية. اوعي تدي للمعتقدات العامة أو الناس اللي حواليك سلطة على تفكيرك

مش عايز تشرب، متشربش. صحة الجسم أهم بكتير من سهرة ممكن تخليك تندم عليها فترة كبيرة. اللي متخيل انك مش روش عشان قررت انك متشربش خالص أو في يوم مشربتش، تفكيره محدود بزيادة ولازم تراجع حساباتك في معرفته. اختياراتك لازم الناس تحترمها

الفحوص الطبية الدورية

أنا آخر واحد أتكلم عن الموضوع ده، لحد يومنا هذا أنا عمري ما رحت لدكتور غير وانا تعبان. معتقدش إني لوحدي في الموضوع ده. ومش فخور وانا بقول كده بصوت عالي. يمكن انا محظوظ اني معنديش مشاكل صحية، لكن هل لازم نستني المشكلة لما تحصل عشان نتصرف؟

الكلام اللي جي ده لنفسي قبل ما يكون ليكو. الفحوص الطبية الروتينية شئ مهم وضروري كل 6 شهور عشان نتأكد ان مفيش أي مشاكل صحية أو نلحقها قبل ما تزيد ويصعب علاجها. احنا بنعمل صيانة العربية الدورية بغض النظر عن حالة العربية، خلينا نفكر بنفس المنطلق ده مع جسمنا

النفسية السليمة في الجسم السليم

محدش فينا يقدر ينكر الرابط الموجود بين الصحة النفسية والصحة الجسمانية. وجود بعض المشاكل النفسية بيأدي لأعراض جسمانية سلبية زي الأرق وفقدان الشهية، أو النوم المفرط والأكل بشراهة. جسم كل واحد فينا بيختار طريقة معينة عشان يتعامل بيها مع المشاكل النفسية اللي بيتعرضلها

حاول بقدر الإمكان تكون واعي للتغييرات اللي جسمك بيتعرض ليها. اتكلم مع حد بتثق فيه سواء كان فرد من العيلة، صاحب، شريك حياتك أو دكتور متخصص. صحتك لازم تبقى الأولوية القصوى

 

أنا عارف ان الكلام ده مش هنقدر نفتكره طول الوقت، لكن بقدر الإمكان لازم نحاول ناخد بالنا من جسمنا وصحتنا. لو معملناش كده دلوقتي، ممكن نندم بعدين لما نكبر. ايه اللي انت بتعمله عشان تحافظ على صحة جسمك؟ شاركنا أفكارك في التعليقات

What do you think?

Avatar

Written by Hassan Saraya

Ever evolving like a Pokemon. Fighting my inner saboteur while obsessing over the latest technology trends.

Comments

Leave a Reply

Avatar

Loading…

0
apps.33165.13542174238989216.6160f3bf da65 4113 8870 4b1bcddf4bb9

Netflix Officially announces a Live-action Series For Resident Evil

dates in egypt

The Best Date Night Restaurants all over Cairo, Egypt!