Ahmed Dahabi
عمرك قعدت مع صحابك علي القهوة وطلبتوا واحد شاي وواحد كوفي ميكس وحجرين شيشة وقعدتوا تفتحوا مشاريع؟
أنا عن نفسي فتحت بتاع 2000 مشروع علي القهوة، وده وأنا في الجامعة بس. دايماً كنا بنطلع بفكرة جامدة جداً، وأصلية ومحدش جابها قبل كدا. أحنا نفتح بلاي ستيشن. ونعمل فيه عصارة. ونعمل سندوتشات وكوفي ميكس. أو نعمل إندومي، العيال عايزة تاكل إندومي وهي بتلعب بلاي ستيشن.
بس دايماً المشروع مكانش بيكمل، علشان كنا صغيرين وسطحيين ومعندناش خبرة في إدارة الأعمال. مكناش عارفين أن أي مشروع مهما كان صغير هيحتاج دراسة جدوي ودراية بالسوق وإحتياجاته في مقابل المطلوب والمعروض واللي نقدر نقدمه. الموضوع كان أعقد بكتير من دماغنا المسحولة في امتحانات أخر السنة في الكلية ونازلة تفك بحجر شيشة علي القهوة.
شوية شباب زي الورد ومشروع كوفي ميكس ميخرش الميا
https://www.facebook.com/permalink.php?story_fbid=106492981356946&id=106473838025527
بص يا سيدي، الشباب دول فتحوا جروب علي الفيسبوك أسمه “كوفي ميكس النصب عيني عينك” علشان يطالبوا الناس تدعمهم بعد ما اتعرضوا للنصب واتضحك عليهم زي ما بيقولوا.
بيبدأ أول بوست علي الصفحة قائلاً:
أنا محتاج الناس تسمعني وتفهم انا ليه فتحت حوالي ٢٥ الف كيس كوفي مكس ..!انا عارف ان ال هقولو ده غريب عليكو بس احنا دايما بنفكر برة الصندوق.
والحقيقة أن حكايتهم بره الصندوق خالص.
وبيكمل صاحب البوست وبيقول:
جيت انا وجماعه صحابي ، اتفقنا نشترك في المسابقة وطبقنا نظرية “أحتمالية حدوث الشئ” ال بتقول لو جبت ٧ كور حمر وتلاته الوان تانية وحطيتهم في ازازة ورجيتهم اول واحدة هتنزل اكيد الحمرا
ف اكيد لو انا بعت بنسبة ٧٠ في المية من الاكواد ال هتتبعت في المسابقة هكسب ومش هكسب عربية واحدة لا اكتر طبعاوبالفعل عملنا سيستم مشابه لسيستم المسابقه عن طريق مبرمجين عشان نتوقع هنكسب كام عربية والنتيجة كانت ٦ عربيات وده قبل ما ننزل ارض الواقع.
الشباب دول متضايقين وعايزين حقهم من كوفي ميكس
حالة من الغضب الشديد في كل بوستات الشباب دول علي صفحتهم علي الفيسبوك بيتهموا فيها شركة بونجورنو كوفي ميكس إنها نصبت عليهم لأنهم كانوا متأكدين “بناءاً علي حساباتهم” أنهم لازم يكسبوا “علي الأقل” 6 عربيات.
وبيطالبوا بحقهم من الشركة، علشان هما ضيعوا كل فلوسهم ومجهودهم علي احتمالات المكسب ومكسبوش أي حاجة.
فين حق الشباب اللي زي الورد دول؟
أحنا الحقيقة مش شايفين فين النصب في الموضوع ومش شايفين في حق الشباب اللي بيطالبوا بيه ده. هما عملوا حسبة غريبة وملهاش أي منطق خالص.
هما افتكروا ان كل الأكياس الكسبانة لازم تكون في القاهرة؟ مينفعش أكياس كسبانة تروح أي محافظة تانية في مصر؟
وهما لو أشتروا 25 ألف كيس كوفي ميكس، شوف في كام ألف كيس مفتحوهمش. يبقي مش من حقهم يقولوا أن حد نصب عليهم.
الموضوع كله ساذج أوي فعلاً، وأكيد أنت مستغرب أزاي حد فكر بالطريقة دي أصلا. ما بالك بمجموعة كبيرة من الناس فكرت واتحركت علي أساس الفكرة دي.
حاجات تاني كان ممكن يعملوها علي القمار علي كوفي ميكس
كان ممكن يعملوا حاجات كتير أوي بالأكتر من 50 ألف جنية اللي صرفوها علي القمار مع كوفي ميكس.
1- كان ممكن يشتروا العربية تقسيط
2- كان ممكن يعملوا مشروع قهوة علي عربية
3- كان ممكن يشاركوا في أي مشروع تجارة بالمبلغ ده
4- ممكن يفتحوا محل صغير يبيعوا فيه أي حاجة
احنا بجد متضايقين جداً أنهم خسروا فلوسهم بالشكل ده، وفاهمين أكيد أنهم متضايقين وزعلانين علي فلوسهم، بس الحقيقة منقدرش ننكر أن الموضوع كوميدي شوية وبيضحك، بس نتنمني يستفيدوا من الدرس ده وميجروش ورا أفكار مش مدروسة كويس بعد كدا.
