LoveLove

ازاي 2020 غيرت مفاهيم الموضة في العالم كله؟

كلنا اتعرضنا للتريقة علي جسمنا لو مكانش طول الوقت هيكون علي الأقل في وقت من حياتنا، وده أثر علي نفسيتنا وثقتنا في نفسنا

ازاي 2020 غيرت مفاهيم الموضة في العالم كله؟

مفهوم الجسم المثالي اللي مجلات الموضة والجمال بتروج له بيعتمد علي موديل بنت مقاسها 0  ،معندهاش اي دهون في جسمها. أو موديل ولد بعضلات وبرضه معندوش اي دهون في جسمه.

مع الوقت المفهوم التقليدي ده حدد معايير الجمال عند العالم كله واصبح هو الهدف من وجودنا.

بقي لازم نكون شبه عارضين الأزياء اللي علي المجلات دي علشان نعتبر حلوين، وربطنا حبنا لذاتنا ولجسمنا بالمعايير المستحيلة دي والحقيقة ان أجسام عارضين الأزياء دول مش صحية خالص.

مفاهيم الموضة ما بين المجلات والحقيقة

لو كان جسمك مش زي الاجسام بتاعت عارضين الأزياء بيتقالك سلبي بيضايقك وبيخليك تحس انك وحش وتكره جسمك ونفسك. في حين ان الاجسام الصحية مش شبه كدا خالص.

الجسم المثالي بيتحسب بمعادلة ما بين الطول والوزن ولازم يكون عندك نسبة دهون صحية في الجسم علشان الجسم يشتغل بطريقة صح. والغريب ان الاجسام المثالية من الناحية الطبية بتعتبر – طبقاً لمعايير الموديلز – تخينة!!

كل واحد مننا عنده مفهومه الخاص بالجمال

لما بنتكلم مع بعض ونتكلم بصراحة عن مفهومنا الشخصي للجمال هنلاقي كل واحد مننا عنده تعريف مختلف عن التاني.

كل واحد مثلا بيحب الشريك الجنسي بتاعه يكون له شكل معين، وبنتفاجئ جداً من الحاجات المفضلة عند التانيين من حيث الجسم والشكل. والتفضيلات الجنسية هي تفضيلات جمالية في الاساس!

معني كدا ان مفاهيم الجمال اللي بتتصدرلنا من عارضين الأزياء، واللي بنفضل نمجدها ونعتبرها المفهوم الوحيد للجمال، بتعبر عن رأيي مجموعة محددة جداً من الناس عن الجمال. وللأسف المجموعة دي قدرت تفرض مفاهيمها الشخصية علي العالم كله بإستخدام العولمة والسلطة المتمثلة في الاعلام اللي بيروج للموضة وبالتالي الجمال!

العالم كله بيحاول يغير المفاهييم المغلوطة عن شكل الجسم المثالي

ازاي 2020 غيرت مفاهيم الموضة في العالم كله؟

ليزو واحدة من الفنانات الجداد اللي طلعوا يتكلموا عن موضوع التنمر علي شكل الجسم وازاي ده بيأذينا كلنا.

الطريقة اللي ظهرت بيها مغنية راب وبوب زي ليزو بشكل الجسم اللي مش متعودين نشوفه في النوع ده من الفن كانت مؤثرة جداً، ولأن الفن والمزيكا واحدة من الساحات اللي بتأثر علي مفاهيم الجمهور عن الجمال والجسم المثالي، استغلت ليزو موقعها كمغنية مشهورة وليها معجبين كتير في انها تغير الصور النمطية المؤذية دي وبالتالي تغير مفاهيم الموضة.

مجلة فوغ، اكبر ساحة كانت بتوج للمفاهيم المسمومة عن الجسم الجميل والموضة، بدأت تغير مفاهيمها

ازاي 2020 غيرت مفاهيم الموضة في العالم كله؟

ظهور ليزو علي غلاف مجلة فوغ هو إعتراف من المجلة بأن كل المفاهيم القديمة بتاعتها غلط ومسمومة وانها بتحاول دلوقتي تصدر مفاهيم اكثر صحية عن الجمال والموضة.

مش بس فوغ، في كتير من مجلات وساحات الموضة بدأت تستخدم عارضي وعارضات أزياء أجسامهم متوسطةأو كبيرة الحجم، زي كالفين كلاين.

الموضة

طبعاً ليزو اتعرضت لانتقاضات كتير من وقت ظهورها كمغنية. الانتقاضات كان اغلبها عن جسمها ووصفها بانها تخينة وأشكال تانية من الإساءة علي شكلها.

ليزو قوية جداً وقدرت تواجه كل التنمر ده وظهرت في فيديوهات كتير بتتكلم عنه.

في الفيديو ده ليزو بتشرح ازاي هي بتلعب رياضة علشان توصل لشكل الجسم اللي هيا عايزاه مش اللي الناس عايزاه.

وبتقول ان الصحة مش في شكل الجسم من برة. الجسم الصحي هو اللي بيشتغل كويس من جوا. وبعدين بتضيف ان في ناس كتير محتاجة تنضف اللي جواها.

ده واحد من مجموعة فيديوهات بتنزلها ليزو من وقت للتاني بتناقش فيها قضية الجسم الصحي ومفاهيمه عندنا.

بيلي ايليش بتتكلم عن وجهة نظرها في الجسم الجميل والموضة

بيلي برضه من الناس اللي اتعرضت للتنمر علي شكل جسمها، علشان بتختار ستايل لبس واسع جداً، واتقال عليها انها تخينة وجسمها شكله وحش علشان كدا بتحاول تخبيه باللبس ده.

ظهرت في الفيديو ده علشان تقول ان اختيارات لبسها حاجة تخصها هي ومحدش من حقه يتدخل فيها.

وكمان قالت ان جسمها حلو علشان هي بتحبه زي ماهو مش علشان الناس راضية عنه.

احنا مش بنشجع شكل جسم معين أو بنفضل شكل جسم علي التاني أو حتي موجة معينة من الموضة. بالنسبالنا مفيش جسم حلو وجسم وحش، كل الاجسام حلوة بشكلها الخاص. عايزين نشجع وندعم المفاهيم الايجابية دي علشان تنقذنا من الاحاسيس السلبية اللي ممكن تدمرنا كأشخاص. ومش معني كدا اننا بنشجع علي اسلوب حياة غير صحي. السمنة المفرطة مش صحية وبتأذي الافراد. بس النحافة المفرطة كمان مش صحية وبتأذي الافراد. الجسم الصحي هو اللي اعضاءه الداخلية بتشتغل كويس ومفيش حاجة مش قادرة تعمل وظيفتها. 

What do you think?

Avatar of Ahmed Dahabi

Written by Ahmed Dahabi

Contributor

Leave a Reply

اعرفوا معانا توقعات الأبراج لسنة 2021

اعرفوا معانا توقعات الأبراج لسنة 2021

Azza Fahmy Jewellery Opens at THAT Concept Store in Dubai

Dubai: Azza Fahmy Jewellery Now Opens at THAT Concept Store