in

LoveLove OMGOMG

اعرفوا معانا توقعات الأبراج لسنة 2021

اعرفوا معانا توقعات الأبراج لسنة 2021

خلاص فاضل 12 ساعة وهنكسر قُلة ورا سنة ٢٠٢٠ بكل حواراتها وكراكيبها، ونبتدي سنة جديدة واحنا بنتلفت حوالينا، نتمنى إنها تكون أفضل وأحسن على كل المستويات.

الشاي انهارده جابلكم توقعات كل الأبراج لسنة 2021 اللي فيها كتير من الانفراجات وسنة تعويضات لبعض الأبراج بعينها اللي تعبت جداً في ٢٠٢٠ خصوصا في الربع الأخير من السنة زي برج السرطان، والميزان، والجوزاء…وسنة تحديد مصير خصوصاً على المستوي المهني والأشخاص المحيطين لمجموعة من الأبراج تانية زي الحوت، والعقرب، والحمل، والثور، والدلو.

النظرة العامة لـ2021

من أهم الأحداث الفلكية اللي حصلت السنة دي هو اجتماع كل من كوكب أورانوس الموجود في برج الثور وزُحل الموجود في برج الدلو في مربع واحد وده مابيتكررش غير كل ٢٠ سنة، واللي بسببه كانت ٢٠٢٠ مليانة بأحداث درامية من أهمها فيروس كورونا المستجد اللي أثر على المستوى السياسي والاقتصادي في العالم كله.

اعرفوا معانا توقعات الأبراج لسنة 2021 

لكن من حسن حظنا إن في 2021 كوكب بلوتو اللي بيرمز للحياة وما بعد الحياة، هيتراجع لبرج الجدي في الفترة بين ٢٤ ابريل و٦ أكتوبر ليستعيد العالم شيء من الهدوء والاستقرار الاقتصادي اللي تأثر بسبب تداعيات فيروس كورونا.

كمان في ثلاث تراجعات مهمة لكوكب عطارد السنة دي في الفترات بين ٣٠ يناير و٢٠ فبراير، ٢٩ مايو و٢٢ يونيو، و٢٧ سبتمبر الي ١٨ أكتوبر، الى جانب إن القمر بيمر بأربع مراحل للخسوف أيام ٢٦ مايو، ١٠ يونيو، ١٩ نوفمبر، و٤ ديسمبر ودي كلها تواريخ مهمة جداً ممكن يحصل فيها تغيرات وتطورات جذرية لكل الأبراج، فحاولوا تهدوا وتتجنبوا الدراما.

توقعات الأبراج لـ2021 

برج الحمل (٢١ مارس – ١٩ ابريل)

السنة دي سنة العلاقات الصحية الجديدة، لكن عليك إنك تتوخى الحذر قبل ما تقرر تقديم أي التزامات، لأنك لازم تنهي كل العلاقات القديمة اللي كانت مسببالك توتر شديد في فترة ٢٠٢٠ وانت عارفهم كويس..بعد كده هتلاقي إنك وفرت مساحة كبيرة من حياتك وطاقتك علشان تبتدي على نضيف.

حظك حلو إن برج الزهرة المسؤول عن الحب والجمال هيدخل برجك من يوم ٢٠ مارس وده وقت مناسب جداً لعلاقة حب حقيقية جديدة أو هدوء في حياتك العاطفية حالياً. بنفكرك بتواريخ خسوف القمر، بلاش فيها أي تهور أو قرارات انفعالية لمصلحتك. بلاش تاخد أي قرارات مهمة أو توقع أي عقود في فترات تراجع عطارد اللي اتكلمنا عنها من شوية.

برج الثور (٢٠ ابريل– ٢٠ مايو)

سنة الشبرقة والبعزقة!

عشان كدة 2021 هي سنة الفرص والمكاسب والتغيير الشامل في حياتك المهنية. استعد عشان هتكسب فلوس كتير، هتحدد نقط قوتك، احتياجاتك، ومتطلباتك بدقة شديدة.

هتحس بشوية صراعات جواك بين التفكير المحافظ والأفكار الثورية، لكن هتقدر توصل لمرحلة من الإبداع هتزود من احتمالية حدوث حاجات كتير كنت بتتمناها السنة اللي فاتت وماتحققتش. هتتفاجئ إن فيه أشخاص من علاقات قديمة هيحاولوا يرجعولك السنة دي سواء انت بتتمنى رجوعكم لبعض أو لا، فخلي بالك.

برج الجوزاء (٢١ مايو – ٢٠ يونيو)

 سنة الأفعال مش الأقوال!

هتكون مركز الاهتمام السنة دي، صوتك هيكون مسموع جدا، حاول تستغل القوة دي لصالحك. واضح إنك اشتغلت كتير على نفسك في ٢٠٢٠ رغم إنك كنت بعيد شوية عن وسائل التواصل الاجتماعي أو التواصل مع الناس بشكل عام.

ممكن تكون بدأت مشروع خاص بيك او شغل في مكان جديد، صدقنا هتجني ثمار كل التعب ده السنة دي بس خلي بالك من صحتك شوية. وبما إن كوكبك الحاكم هو عطارد، فتراجعاته هتأثر عليك جدا! لو سمحت ركز مع الـE-mail بتاعك وتليفونك في الفترات دي.

كسوف الشمس اللي هيحصل في برجك خلال شهر يونيو، فرصة كويسة علشان تسمع أخبار حلوة. هتعيد تقييمك وحساباتك في العلاقات العاطفية الحالية، القديمة، أو اللي ممكن تحصل. بإختصار هي سنة نمو شخصي ومكاسب مهنية.

برج السرطان (٢١ يونيو – ٢٢ يوليو)

مبروك إنك لسة عايش معانا بعد ٢٠٢٠!

السنة دي سنة تصفية الحسابات. هل مكمل في العلاقات اللي حواليك لأنها تستحق ولا عشان تبان قدام الناس إنك شخص كويس؟ فكك وعيش بمبادئك ووجّه طاقتك للعلاقات الصحية اللي بتعكس قيمتك. بما إن القمرهو كوكبك الحاكم، هتواجه صدامات كتير مع أصدقاء أو أحباب في فترات خسوف القمر الأربعة اللي اتكلمنا عنهم.

حافظ على هدوء أعصابك وقتها وفي نفس الوقت ركز على نفسك أكتر. صحياً انت أفضل بكتير من السنة اللي فاتت، لكن مهنياً هتواجهك مشكلة في الشغل أو ممكن تغير شغلك بس عامةً السنة دي أحسن بكتير.

برج الأسد (٣٢ يوليو – ٢٢ اغسطس)

أخيراً هتتعلم الصبر وإنك تستنى الحاجات اللي تستحقها!

السنة دي هتلم شتات نفسك وترجع تقف على رجلك بقوة بعد كل الصدمات اللي شوفتها في ٢٠٢٠. بعد طول انتظار، هتلاقي وظيفة أحلامك بسبب اجتماع أورانوس وزحل في مربع واحد. وفي نفس الوقت عليك إنك تقدم شوية تنازلات في شغلك الحالي، كبر دماغك شوية، ماتقفش على كل حاجة لحد ما فرصة عمرك تجيلك. وياريت ماترجعش لحبيبك السابق.

السنة دي شعارها “اتقل تاخد حاجة نضيفة” علشان الوقت اللي انت فاكر إنك هتتبسط فيه معاه، ممكن يضيع منك فرصة حب حقيقي تستمر لسنين وسنين. صحياً، زي السنة اللي فاتت، مفيش اختلاف كبير.

برج العذراء (٢٣ اغسطس – ٢٢ سبتمبر)

 طبعاً بما إنك تتغذى على الكمال فنحمد ربنا إنك عديت من ٢٠٢٠ أساساً! انت منهك بشكل مرعب لأنك بتكره الفوضى وطبعاً انت عارف ٢٠٢٠ كان فيها إيه!!!

ارتاح عزيزي برج العذراء. السنة دي تقدر تاخد نفسك وتستمع بقسط كبير من الراحة وصحة أفضل خصوصاً صحتك العقلية والنفسية. حياتك العاطفية هيكون فيها مساحة أكبر لعلاقات جديدة، ومش بعيد يكون فيه مشروع ارتباط رسمي سواء خطوبة أو جواز للأشخاص الـSingle أما المرتبطين ممكن يواجهوا شوية دراما خصوصا إنهم بيمروا بعلاقة مذبذبة مع الشريك بقالهم فترة.

خد القرار الصح بالإستغناء حتى لو كان صعب. مادياً! السنة دي سنة تحولات مهنية ومادية كبيرة، أه انت حققت فعلاً نجاحات في ٢٠٢٠ ولكنها هتفضل مكملة معاك في 2021.

برج الميزان (٢٣ سبتمبر – ٢٢ اكتوبر)

حمدلله على السلامة يا آخي!

عارفين إنها كانت من أصعب السنين اللي مرت عليك خصوصاً في الربع الأخير منها. كم ضغوط مش طبيعي وصحة في النازل، لكن اطمن! السنة دي سنة حاسمة في حياتك، سنة وضع الحدود لكل شيء وفي نفس الوقت سنة التعويضات خصوصاً على الصعيد النفسي والعاطفي.

مادياً، انت كنت مستقر في ٢٠٢٠، اه ماحصلش أي تغيرات مادية ملحوظة ولكن ماوجهتش أي مشاكل. السنة دي مادياً انت أحسن بكتير بس محتاج تركز في الفرص اللي بتجيلك وبطل تردد وتفكير كتير علشان ماتضيعش حاجة من إيدك. خلي بالك من فترات تراجعات عطارد، لو ناوي علي سفر، بلاش! لو هتبدأ مشروع جديد، بلاش! حاول تكون حذر جداً جداً في الوقت ده.

برج العقرب (٢٣ اكتوبر – ٢٢ نوفمبر)

انت من أهم الأبراج السنة دي بسبب قوتك وصلابتك وتصميمك إنك تفضل واقف على رجلك. على الصعيد العاطفي، بطل مطاردة القديم واهدي شوية على الجديد أو الحالي علشان انت ممكن تبوظ الدنيا من غير ماتقصد. وبدل ماتدور على علامات تثبت شكوكك اللي جوا دماغك بس، دور على علامات تثبتلك قد إيه شريك حياتك بيحبك. اتعلم تميز بين التهديد الحقيقي والمزيف.

مادياً! انت من أحسن الأبراج في 2021، لأنك هتستمتع بفرص فيها تدفق مالي كبير. صحياً، انت زي البمب.

برج القوس (٢٣ نوفمبر – ٢٢ ديسمبر)

محتاج تعمل دايت وتاكل هيلثي وتهتم بصحتك حبتين تلاتة. بطل إهمال واشتغل على تقوية جسمك شوية. درب نفسك إنك تهدى ذاتياً، علشان تتجنب صوت إنذار الحريق اللي بيضرب كل شوية.

السنة دي هتركز على العيلة والأصدقاء أكتر. ممكن تكتسب صديق حقيقي جديد أو لو تُرزق حتى بمولود جديد. هيجيلك فرصة كويسة جداً عن طريق السفر وده لأنك مدمن سفر، أو فرصة شغل أو فرصة حب.

تراجعات كوكب عطارد هتخليك تعيد النظر في شوية قرارات وتصرفات كده كنت فاكر إنها صح وهتتصدم بالنتيجة.

برج الجدي (٢٢ ديسمبر – ١٩ يناير)

انت من أكتر الأبراج اللي طلعت من ٢٠٢٠ سليمة رغم إن وجهة نظرك تجاه حاجات كتير اتغيرت! لكن السنة دي لو في أي جروح، هتداوى. معروف عنك انك متحفظ وبتتحرك ببطئ ناحية أهدافك وساعات قاسي على نفسك في بعض الأحيان، لكن في 2021 لازم تتعلم إنك تخاطر لكن بطريقة محسوبة. نفذ مشاريع أكتر ترضي إبداعك، ماتخافش!

والمشاكل اللي هتاخد أكبر من حجمها إرميها ورا ضهرك. بطل تعاند وتقول إنك على حق دايماً لأن ده ممكن يسببلك مشاكل مهنية و شخصية، واتعلم تتعامل بطريقة أفضل مع مشاعرك. مادياً، هتتفتحلك فرص كانت اتقفلت زمان وهتكسب من خلالها مكسب مادي هيرضيك.

برج الدلو (٢٠يناير – ١٨ فبراير) 

برافو عليك إنك عرفت تشغل تفكيرك طول ٢٠٢٠ في حاجات كتير، بدل ما تغرق في بحر اليأس. مهمتك في 2021 إنك تكسر كل الحيطان وتضع نفسك في المرتبة الأولى. أخيراً السنة دي هتحصل على التقدير اللي تستحقة.

انت بتعرف تشغل نفسك كويس جداً وده بيخليك تنسى حاجات مهمة حواليك، مش صحابك ولا حبيبك، ولكن بتنسى نفسك، وده لازم يتغير السنة دي. لازم تركز على نفسك ولنفسك أكتر من أي حد تاني علشان تقدر ترجع تاني وبقوة لدايرة الضوء اللي انت بتحبها. في ناس في حياتك انت قطعت علاقتك بيهم، هيظهروا من جديد علشان يعطلوك، ياريت ماتديهومش الفرصة!

مادياً، هيجيلك فرصة من دهب في وقت مافيهوش فرص، ماتقفلش على نفسك وتضيعها. افتكر دايماً إن مكانك الصح في وسط الدايرة، اتعب شوية علشان توصل لده.

برج الحوت (١٩ فبراير – ٢١ مارس) 

شكراً من كل قلبنا انك عديت من ٢٠٢٠! أخيراً في 2021 هيكون فيه فرصة للشفاء نفسياً وعقلياً. السنة دي كل تركيزك هيكون على مستقبلك وتحديد أهدافك وازاي هتكون مستعد ليها. انت حساس جدا واستوعبت كم كبير من الألم في ٢٠٢٠.

العالم محتاجك، فياريت تثبت. هيحصل تراجع لبلوتو في وقت معين من السنة هتمر بفترة أسف على أفعال سابقة عملتها، فحاول تدور علي طرق جديدة للنمو بدل ما ترمي اللوم على نفسك. مادياً، في تطور مش كبير لكن ملحوظ بس الأكيد مش هيكون نفس الوضع الصعب اللي مريت بيه في ٢٠٢٠. أما صحياً، يا ريت تركز شوية وماتخدش أدوية كتير او حتى أدوية ماتعرفهاش.

في المجمل، سنة هادية يا جميل!

From Harassment, To Bullying, Rumors of Cancellation: The Tragedy of The Egyptian Women's National Football team

From Harassment, To Bullying, To Rumors of Cancellation: The Tragedy of The Egyptian Women’s National Football team

ازاي 2020 غيرت مفاهيم الموضة في العالم كله؟

ازاي 2020 غيرت مفاهيم الموضة في العالم كله؟