in

إعلان ارتباط معز مسعود بحلا شيحة والسوشيال ميديا هتنفجر ميمز

في كل مرة بيعلن فيها معز مسعود ارتباطه من واحدة جديدة بيتفتح علي زوجاته السابقات ماسورة تريقة واستهزاء مش مقبولة خالص

photomix image 9
photomix image 9

بعد ما انتشرت اخبار عن ارتباط معز مسعود و حلا شيحة ، خلال اليومين اللي فاتو، السوشيال ميديا اتقلبت وكل الناس عماله تتكلم عن الداعية الإسلامي اللي بيتجوز علي نفسه.

لازم نوضح في البداية أن مسعود هو باحث انساني ومنتج فني، أنتج مجموعة من البرامج التلفزيونية والإذاعية اللي بتناقش الإنسان وعلاقته بالدين والطريقة اللي يقدر من خلالها يكون انسان افضل. نظراً لأن مسعود مسلم متدين وبيناقش طريق الانسان للصلاح من خلال الشريعة الإسلامية اتاخدت عنه صورة الداعية الإسلامي، رغم انه مش خريج أزهر ولم يدعي شخصياً أنه داعية اسلامي.

معز مسعود في جوازة كل شوية ومع كل جوازة تنمر علي الستات

من الأخبار المنتشرة جداً أن اول جوازات مسعود اللي كان ليها صدي واسع علي السوشيال ميديا، كانت من ملكة جمال الجامعة الأمريكية “سارة”. وأن الجواز تم في 2003 ومكملش كتير.
الحقيقة أن سارة حورية، اللي صورها منتشرة كزوجة سابقة لمسعود، هي خريجة طب أسنان جامعة المنصورة. وملكة جمال مصر للمحجبات 2016، مش الجامعة الأمريكية. كمان أكدت سارة، في أكتر من مرة، من خلال صفحتها علي الفيس بوك، أن ملهاش أي علاقة بمسعود.

 

المشكلة أن في كل مرة بيعلن فيها مسعود ارتباطه بواحدة جديدة، بتتفتح ماسورة تريقة واستهزاء علي الستات اللي عرفهم قبل كدا والسوشيال ميديا بتتقلب ميمز وشيرز وكومنتات بتنتهك مشاعر الستات دول.

بسنت نور الدين ومعز مسعود

معز-مسعود

بسنت هي مرشدة سياحية قدرت تعمل لنفسها حضور قوي علي السوشيال ميديا واليوتيوب من خلال فيديوهات بتشرح فيها تاريخ أماكن أثرية في مصر. اتجوزت مسعود في 2017 واتطلقوا بعد 176 يوم بالظبط.

شيري عادل

معز-مسعود

تم اعلان ارتباط معز مسعود من شيري عادل خلال اعلان مسلسل “السهام المارقة” اللي أنتجه مسعود. وبرضه الجوازة مستمرتش فترة طويلة وانفصلوا في هدوء. الجدير بالذكر أن ارتباط مسعود من شيري سبب ضجة كبيرة أوي نظراً لأن الجمهور شاف انه ينافي المنهج الديني اللي “الداعية الاسلامي” بيدعو الناس اليه، علي حد قول الناس.

حلا شيحة: أخر علاقات معز مسعود!

معز-مسعود

خبر العلاقة بين معز مسعود وحلا شيحة جات بعد نشر صورة علي الانستجرام من اكونت مسعود بيقول فيها: شكراً للشخص اللي سجل اللحظة الخام دي. أنت عارف أنت مين.
علقت حلا شيحة علي الصورة: مين أخد الصورة دي؟. وكان رد مسعود عليها: حد مميز جداً.

 

بعد البوست دا، السوشيال ميديا اتقلبت باخبار عن ارتباط مسعود وشيحة، وطبعاً اخبار الارتباط استدعت للاذهان علاقات مسعود القديمة وصور الستات دول بدأت تطلع تاني والناس رجعت تتريق علي اشكالهم واشخاصهم وميمز كتير انتشرت عن الموضوع ده.

الكوميديا اللي فاكرينها مش بتأذي حد، في الحقيقة بتأذي ناس كتير

الناس لازم تعرف أن الانفصال بين اتنين بيكون عملية طويلة ومرهقة، والألم اللي بيجي معاها بيحتاج وقت طويل علشان نتعامل معاه. ولما الصور والأسماء والتريقة والهزار بيفضلوا كل شوية يطلعوا علي السوشيال ميديا، ده مش بيخلي التعامل مع آلام الإنفصال أسهل، وطبعاً مش محتاجين نقول ان التريقة علي الشكل والشخص هي أكبر درجات الأذى النفسي اللي ممكن نسببه لبعض. وده اللي لخصته بسنت نور الدين في بوست نشرته علي صفحتها علي الفيس بوك تعليقاً علي الضجة والسخرية اللي حصلت.


الهزار والكوميديا والميمز مش بس مقبولة، دي مطلوبة كمان. لكن لازم نعرف حدودنا ونفهم أن آلام الناس وعلاقاتهم مش مادة للهزار والسخرية. ولما كل مرة السخرية والهزار بيكونوا علي الستات بس، مش علي الرجل، في الموضوع، لازم نرجع نسأل نفسنا. ليه الستات هما الضحية دايماً حتي في الهزار والسخرية؟ 

What do you think?

Avatar

Written by Ahmed Dahabi

Blogger. Interested in cinematic, literature and fashion criticism. And the flamboyant boy, vogueing in the party

Comments

Leave a Reply

Avatar

Loading…

0
AUC

All you need to know about the AUC’S Black Camp Scandal

1279440

El Gouna Film Festival Reveals its Official 2020 Posters